नांदेड - जिल्ह्यात आत्महत्या केलेल्या 3 शेतकऱ्यांच्या कारभारणींनी दहावीची परीक्षा दिली. घरच्या कर्त्या पुरुषाने आत्महत्या केल्यानंतर रडत बसण्यापेक्षा परिस्थितीशी दोन हाथ करण्यासाठी या तिघीही शिक्षण घेऊन मैदानात उतरणार आहेत. अर्धापूर तालुक्यातील धामदरी गावातील सुनीता कदम, मालेगाव इथल्या मंगला इंगोले आणि अर्धापूर इथल्या लक्ष्मी साखरे यांनी मंगळवारी दहावीचा पहिला पेपर सोडवला. बहिस्थ विद्यार्थी म्हणून या तिघींनी सतरा नंबरचा फॉर्म भरत ही परीक्षा दिली आहे.
आत्महत्या केलेल्या शेतकऱ्यांच्या कुटुंबातील सदस्यांनी खचून जाऊ नये यासाठी पुण्यजागर प्रकल्पाने या महिलांना ही प्रेरणा दिली. त्यातून आयुष्याच्या नव्या परीक्षेला ह्या तिन्ही शेतकरी महिला सामोऱ्या गेल्या आहेत. शिक्षण अर्धवट सोडणाऱ्यासाठी सतरा नंबरचा फॉर्म भरून दहावीची परीक्षा देण्याची तरतूद आहे. गेल्या 40 वर्षात पहिल्यांदाच आत्महत्या केलेल्या शेतकऱ्यांच्या पत्नीने ह्या तरतुदीचा फायदा घेत ही परीक्षा दिली. दहावीनंतर पुढेही शिक्षण घेत आपल्या कुटुंबाचे भविष्य घडवण्याचा निर्धार या महिलांनी केला आहे. त्यामुळे या महिलांचे सर्व स्तरातून कौतुक केले जात आहे.
घरच्या कर्त्या पुरुषाने आत्महत्या केल्यावर त्या कुटूंबात आडचणींची मालिका सुरू होते. अशा अडचणींशी दोन हात करणारी अनेक शेतकरी कुटूंब अर्धापूर तालुक्यात आहेत. पुण्यातील भोई फाऊंडेशनने अर्धापूर तालुक्यात पुण्यजागर प्रकल्प सुरू केला असून त्याद्वारे शेतकरी कुटूंबातील पाल्यांना शैक्षणिक मदत करण्यात येत आहे. या माध्यमातून मुलांच्या शिक्षणासोबत त्यांच्या पालकांचेही शिक्षण व्हावे यासाठी पुढाकार घेतला. अर्धापूर तालुक्यातील धामदरी येथील सुनिता कदम, मालेगाव येथील मंगला इंगोले व अर्धापूर येथील लक्ष्मी साखरे यांनी बहिस्थ विद्यार्थी म्हणून दहावीच्या परिक्षेचा अर्धापूरमधून अर्ज भरला. त्यांनी अर्धापूर येथील जिल्हा परिषदेच्या माध्यमिक शाळेतील दहावी परिक्षा केंद्रातून मंगळवापरी परीक्षा दिली. त्यामुळे नवी उमेद नवी आशा निर्माण झाली आहे.
हेही वाचा - बारावीचा पेपर देवून परतणाऱ्या विद्यार्थ्याचा अपघाती मृत्यू
पुण्यजागर प्रकल्पाचे डॉ मिलिंद भोई, अनिल गुंजाळ, जिल्हा समन्वयक लक्ष्मीकांत मुळे, गुणवंत विरकर, मुख्याध्यापक डॉ. शेख , रमेश करंजीकर, नागोराव भांगे, छगन इंगळे, सय्यद युनुस, प्रदिप हिवराळे, सय्यद जाकेर जमील अहेमद यांनी त्यांना शुभेच्छा दिल्या. आमच्या कुटूंबातील कर्त्यांनी आत्महत्या केल्यामुळे संपूर्ण कुटूंबावर खुप मोठे संकट आले होते. या संकटातून सावरताना आम्हाला भोई प्रतिष्ठाणने खूप मोठे सहकार्य केले आहे. याद्वारे आमच्या पाल्यांना शैक्षणिक मदत देण्यात येत आहे. तर, पाल्यांसोबत आपणही शैक्षणिक प्रवाहात यावे हा ठाम निर्धार आम्ही केला. दहावीची परीक्षा देतांना आम्हाला आमच्या शालेय जीवनाची आठवण झाली. जीवनातील अनेक परीक्षेत उत्तीर्ण होण्याकरता खडतर प्रयत्न करावे लागले आहेत. आता आम्ही दहावीची परीक्षा दिली आहे. अशा भावना मंगला इंगोले, सुनिता कदम व लक्ष्मी साखरे यांनी व्यक्त केल्या.
खासगीरीत्या परिक्षा देण्यासाठी सतरा क्रमांकाचा अर्ज भरावा लागतो. जिल्हा परिषदेच्या मागच्या 4 दशकांच्या इतिहासात आत्महत्या केलेल्या शेतकऱ्यांच्या पत्नीने परिक्षा देण्याची ही पहिलीच वेळ आहे. या शेतकरी महिलांनी परिक्षा दिल्याने इतर महिला, मुलींना प्रेरणा मिळणार आहे, अशी प्रतिक्रिया मुख्याध्यापक डॉ. शेख यांनी दिली.
अर्धापूर तालुक्यात पुण्यातील भोई प्रतिष्ठानच्या पुढाकारातून आत्महत्या केलेल्या शेतकरी कुटंबातील पाल्यासांठी पुण्यजागर प्रकल्प राबविण्यात येत आहे. या प्रकल्पाच्या माध्यमातून शेतकरी कुटूंबातील पाल्यांना शैक्षणिक मदत दिली जाते. आत्महत्या केलेल्या शेतकरी कुटंबातील महिला खचून न जाता जीवनातील अडचणींना धैर्याने समोरे जात असून या तीनही शेतकरी महिलांनी दहावीची परीक्षा दिली आहे. ही एक सकारात्मक घटना असून शेतकरी कुटुंबाला प्रेरणा देणारी असल्याची प्रतिक्रिया पुण्यजागर प्रकल्पाचे जिल्हा समन्वयक लक्ष्मीकांत मुळे यांनी दिली.
हेही वाचा - खळबळजनक! रुग्णालयातील कर्मचारी बनून तरुणीने ठेवली अत्याचार पीडित बलिकेवर नजर
