नांदेड - जिल्ह्यातील लोहा शहर व तालुक्यात झालेल्या मुसळधार पावसाने हाहाकार उडाला आहे. लोहा शहरापासून सात किलोमीटरवर असलेल्या धानोरा (मक्ता) येथे दोन दुचाकीस्वार नदीपात्रात वाहून गेले असून शोधपथकांना अद्यापही त्यांचा शोध लागलेला नाही.
हेही वाचा... मराठवाड्यावरचं दुष्काळाचं संकट दूर होऊ दे, अशोक चव्हाणांचे विघ्नहर्त्याकडे साकडे
लोहा तालुक्यात अनेक दिवसांच्या विश्रांतीनंतर पावसाचे पुनरागमन झाले. त्यामुळे शहराजवळ असलेल्या धानोरा (मक्ता) येथे रविवारी रात्री ओटा नदीला पूर आला होता. याचवेळी येथील जयराम काशीनाथ भुजबळ (४२) आणि बंडू एकनाथ बोंडारे (४३) हे दोघे दुचाकीवरून पूल ओलांडून जात असताना प्रवाहाच्या जोरामुळे दुचाकीसह वाहून गेले. रविवारी रात्री ही घटना गावात समजल्यानंतर गावकऱ्यांनी पोलिसांना माहिती दिली. मात्र, रात्र असल्यामुळे त्यांचा शोध घेता आला नाही.
हेही वाचा... नांदेड : अंधश्रद्धेपोटी उकळत्या तेलात बुडवले हात; तिघांविरुद्ध गुन्हा दाखल
सोमवारी सकाळी गावकऱ्यांनी पुन्हा शोध सुरू केला असता, त्यांची दुचाकी सापडली, पण या दोघांचा शोध लागू शकलेला नाही. यांचा शोध घेण्यासाठी दोन स्वतंत्र पथके नांदेडहून मागविण्यात आली आहेत. सोमवारी सायंकाळपर्यंत या दोघांचा शोध लागला नसल्याची माहिती महसूल प्रशासनाच्या वतीने देण्यात आली. जि. प. चे सदस्य प्रवीण पाटील चिखलीकर यांनी सोमवारी घटनास्थळी जाऊन पाहणी केली आणि ग्रामस्थांकडन या घटनेचा तपशील जाणून घेतला.
हेही वाचा... पावसाच्या पुनरागमनाने नांदेड जिल्ह्यातील शेतकऱ्यांना सुखद धक्का...!
