नांदेड - जिल्ह्यात 'भारत बंद'ला संमिश्र प्रतिसाद मिळाला आहे. तसेच, स्वाभिमानी शेतकरी संघटनेचे नेते माजी खासदार राजू शेट्टी यांच्या आदेशानुसार संघटनेचे प्रदेशाध्यक्ष प्रा. प्रकाश पोकळे यांच्या नेतृत्वाखाली महाराष्ट्र बंदची हाक देण्यात आली होती. या हाकेला पाठिंबा देत अर्धापुर येथे स्वाभिमानी शेतकरी संघटनेकडून महाविकास आघाडीच्या सरकारने काढलेल्या कर्जमाफीच्या जीआरची होळी करण्यात आली.
'भारत बंद'ला प्रतिसाद म्हणून शहरातील व्यापाऱ्यांनी स्वतःहून आपली दुकाने बंद ठेवली होती. बंदमुळे बाजारात आज शुकशुकाट होता. अत्यावश्यक सेवा वगळता बंदमध्ये सर्वांनी सहभाग नोंदवला. दरम्यान, शासनाकडून जाहीर करण्यात आलेली शेतकरी कर्जमाफी तसेच हमीभाव या दोन्हीही योजना फसव्या आणि शेतकऱ्यांची फसवणूक करणाऱ्या असल्याचा आरोप शेतकरी संघटनेने केला आहे.
हेही वाचा - मुंबईत 'भारत बंद'चा परिणाम नाही; जनजीवन सुरळीत
आरसीइपी करार झाल्यास देशातील शेतकरी उद्ध्वस्त होईल. आरसीइपी करारातून दुग्धजन्य पदार्थ व शेतीमाल वगळण्यात यावा, शेतकऱ्यांच्या सातबारा कोरा करण्यात यावा, शेतीमालाला दीडपट हमीभाव मिळावा, महापोर्टल बंद्द करण्यात यावे आदी मागण्या शेतकऱ्यांनी केल्या आहे. यावेळी, स्वाभीमानी शेतकरी संघटनेचे जिल्हा अध्यक्ष हरिभाऊ कदम कोंढेकर, तालुकाध्यक्ष मारोत भांगे पाटील, किसन मुस्तरे आदींसह उपस्थित होते.
