नांदेड - नितीन गडकरी यांना देशाचे कृषीमंत्री करा, असे वक्तव्य शेतकरी नेते तथा ऊसदर नियंत्रण मंडळाचे सदस्य प्रल्हाद इंगोले यांनी केले आहे. गडकरी कृषीमंत्री झाले तर शेतीचे अनेक प्रश्न मार्गी लागतील आणि शेतकऱ्याच्या आत्महत्या कमी होतील, असे ते यावेळी म्हणाले.
कधी नैसर्गिक तर कधी मानवनिर्मित संकटामुळे शेती हा व्यवसायच अडचणीत आला आहे. त्यामुळे या गंभीर संकटातून शेती आणि शेतकरी यांना वाचवण्यासाठी गडकरी यांना देशाचे कृषीमंत्री केले पाहिजे. तसेच आज घडीला देशातील शेती आणि शेतकऱ्यांचे प्रश्न गंभीर असून शेती समोर फार मोठे संकट निर्माण झाले आहे. हताश झालेला शेतकरी आत्महत्येकडे वळला आहे. हे या देशाचे दुर्दैव आहे. यातून मार्ग काढण्यासाठी देशाच्या कृषी खात्याला इतर अनेक खात्याच्या जोखडातून सोडवण्यासाठी गडकरी यांच्या सारका धडाकेबाज निर्णय घेण्याची क्षमता असणारा नेता मिळणे गरजेचे आहे, असे इंगोले म्हणाले.
भाजपमध्ये आज घडीला वजन असलेला आणि शेती प्रश्नांची जाण असलेला नेता म्हणजे नितीन गडकरी आहेत. आतापर्यंत त्यानी ज्या-ज्या खात्यांमध्ये काम केले, त्या खात्यांचा चेहरामोहराच बदलून टाकला आहे. आता त्यांच्यासारख्या नेत्याची कृषी खात्याला आणि देशातील शेतकऱ्यांना गरज आहे. त्यामुळे भाजपच्या देशपातळीवरील नेतृत्वाने आणि राज्यातील नेतृत्वाने गडकरींची शिफारस करुन त्यांना देशाचे कृषी खाते दिले तर भविष्यात शेतकरी आत्महत्येचे प्रमाण नक्कीच कमी होईल, असेही इंगोले यावेळी म्हणाले.
