नांदेड - बिलोलीतील बोळेगाव शिवारात जलयुक्त शिवार योजनेतून लाखो रुपये खर्च करून तीन बंधारे बांधण्यात येत आहेत. मात्र हे बंधारे निकृष्ठ असून केवळ बिल उचलून घेण्याची जणू लगीनघाई ठेकेदारांकडून चालवली जात असल्याचा आरोप शेतकऱ्यांकडून करण्यात येत आहे.
बिलोली तालुक्यातील बोळेगाव शिवारात शासनाने जलयुक्त शिवार योजनेतून लाखो रुपये खर्च करून गावाशेजारील नदीवर तीन बंधारे बांधण्यात येत आहेत. मात्र शासनाच्या मुळ हेतू प्रमाणे येथे काम होत नाही. संबंधित ठेकेदारांकडून या बंधाऱ्यासाठी अत्यल्प सिमेंटचा वापर होतो. रेतीसाठी कुठल्याही प्रकारची रॉयल्टी न भरता ज्या ठिकाणी बंधारा बांधण्यात येत आहे, त्या नदीतीलच जाड वाळूचा, मातीचा वापर होत आहे. बंधारा बांधकामाच्या आसपास दूरदूरवर पाणी उपलब्ध नसल्याने पाण्याचाही वापर होत नाही. हे काम संबंधित तलाठी, मंडळाधिकारी यांच्याअंतर्गत नसल्याने यांचेही याकडे दुर्लक्ष झाले आहे. यांच्या प्रमाणेच ग्रामापंचायतही ठेकेदाराशी आर्थिक संबंध साधून या निकृष्ट दर्जाच्या कामाकडे दुर्लक्ष करीत असल्याचा आरोप करण्यात येत आहे.
या कामासाठी नेमण्यात आलेले अभियंताही चिरीमिरीच्या लालसेने फक्त औपचारिकता पूर्ण करून अप्रत्यक्षपणे ठेकेदाराची भलावण करण्यातच धन्यता मानत आहेत. यामुळे या बांधकामाचा दर्जा ढासळलाच पण ठेकेदाराच्या हातात बिल पडेपर्यंतही हा बंधारा टिकतो की नाही, अशी शंकाच आहे. संबंधित विभागाने याकडे लक्ष देऊन हे बांधकाम थांबवून बिल अदा करू नयेत, अशी मागणी शेतकरी व ग्रामस्थांतून होत आहे.
