नांदेड - मुंबई प्रादेशिक हवामान केंद्राने दिलेल्या सूचनेनुसार 1 ते 3 जून 2021 याकाळात जिल्ह्यात तुरळक ठिकाणी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह पाऊस पडण्याची शक्यता वर्तविली आहे. खबरदारीचा उपाय म्हणून नागरिकांनी काळजी घ्यावी, असे आवाहन निवासी उपजिल्हाधिकारी प्रदीप कुलकर्णी यांनी केले आहे.
हेही वाचा - कोरोनाच्या पार्श्वभूमीवर गुणांपेक्षा विद्यार्थ्यांचा जीव महत्वाचा; राज्य सरकारची न्यायालयात भूमिका
या गोष्टी करा :
विजेच्या गडगडाटासह पावसाची पूर्वकल्पना असल्याने बाहेर जाणे टाळा.
जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा.
आकाशात विजा चमकत असल्यास घरात किंवा सुरक्षित इमारतीत आश्रय घ्या.
घराच्या बाल्कनी, छत अथवा घराबाहेरील ओट्यावर थांबू नका.
आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा.
तारांचे कुंपण, विजेचे खांब व इतर लोखंडी वस्तूंपासून दूर रहा.
पाण्यात उभे असाल तर तात्काळ पाण्यातून बाहेर पडा.
या गोष्टी करु नका :
आकाशात विजा चमकत असल्यास घरातील लँडलाईन फोनचा वापर करू नका.
शॉवरखाली अंघोळ करू नका.
घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत
उपकरणांचा वापर करू नका.
विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका.
उंच झाडाच्या खाली आसरा घेऊ नका.
धातूंच्या उंच मनोऱ्याजवळ उभे टाकू नका.
जर आपण घरात असाल तर उघड्या दारातून अथवा खिडकीतून वीज पडताना पाहू नका.
हे बाहेर थांबण्याइतकेच धोकादायक आहे, असेही आवाहन नांदेड जिल्हा प्रशासनाने केले आहे.
हेही वाचा - मुंबई महापालिकेच्या ग्लोबल टेंडरसाठी मुदत संपली; ९ पुरवठादारांची छाननी होणार
