नागपूर - उपराजधानी नागपुरात महिला अत्याचाराच्या दोन धक्कादायक घटना पुढे आल्या आहेत. पहिली घटना गिट्टीखदान पोलीस ठाण्याच्या हद्दीत घडली. एका मित्राने अत्याचार केल्यामुळे १६ वर्षीय तरुणीला गर्भ धारणा झाली आहे. तर, दुसऱ्या एका घटनेत घरमालकाने सात वर्षीय चिमुकलीवर अत्याचार केला. या प्रकरणी पारडी पोलीस ठाण्यात गुन्हा दाखल करण्यात आला आहे. दोन्ही गुन्ह्यांतील आरोपींना पोलिसांनी अटक केली.
पहिल्या घटनेतील आरोपी ऋषभ इंदूरकर व १६ वर्षीय पीडितेमध्ये मैत्री होती. कालांतराने दोघांमध्ये जवळीक निर्माण होऊन प्रेम संबंध तयार झाले. ऋषभ याने लग्नाचे आमिष देऊन पीडितेवर अत्याचार केला. त्यामुळे ती चार आठवड्यांची गर्भवती झाली. तिच्या पोटात दुखत असल्याने पीडितेच्या आईने तिला रुग्णालयात नेले असता ती गर्भवती असल्याचा खुलासा झाला. त्यानंतर पीडितेच्या कुटुंबीयांनी आरोपी ऋषभ विरुद्ध तक्रार दाखल केली. ज्याच्या आधारे पोलिसांनी गुन्हा नोंदवून आरोपीला अटक केली आहे.
दुसरी घटना पारडी पोलीस ठाण्याच्या हद्दीत घडली आहे. घरी कुणीही नसल्याचे बघून आरोपी घरमालक प्रीतम पटेल याने सात वर्षीय चिमुकलीवर अत्याचार केला. ज्यावेळी ही घटना घडली त्यावेळी पीडित मुलीची आई व आरोपीची पत्नी बाजारात गेल्या होत्या. संध्याकाळी पीडितेची आई घरी आल्यानंतर तीने आईला झालेला प्रकार सांगितला. या आरोपी विरुद्ध गुन्हा दाखल करून त्याला अटक केली आहे.
१६ वर्षीय पीडिता चार आठवड्यांची गर्भवती -
गिट्टीखदान पोलीस ठाण्याच्या हद्दीत घडलेल्या घटनेतील १६ वर्षीय पीडिता ही चार आठवड्यांची गर्भवती आहे. तिच्या पोटात वाढत असलेला गर्भ पाडण्यासाठी न्यायालयाची परवानगी घ्यावी लागणार आहे. त्यामुळे पीडितेच्या कुटुंबासमोर संकटांचा डोंगर उभा राहिला आहे.
