नागपूर - महानगरपालिका संचलीत करत असलेल्या स्टार बसला लाखो रुपयांचा चुना लावण्यात आला आहे. कंडक्टरनी व्हॉटस्अॅप ग्रुप तयार करुन मनपाच्या 'आपली बस'ला लाखो रुपयांचा चुना लावला आहे. बसमध्ये कंडक्टरला मोबाईल वापरण्यास बंदी आहे, तरिही सर्रासपणे मोबाईलचा वापर होतो आहे.
यातूनच व्हॉटस्अॅप ग्रुप तयार करुन अनेक कंडक्टर मिळून रोज लाखो रुपयांचा आपली बसला चुना लावत होते. नागपूरकरांची हक्काची आपली बस म्हणजे स्टार बस पण ही बससेवा काही दिवसांपासून तोट्यात आहे. बसचे रोजचे १४ ते १७ लाखांचे उत्पन्न आहे. या उत्पन्नात वाढ व्हावी म्हणून २२ जानेवारी २०१९ पासून तिकीटाच्या दरात वाढ करण्यात आली आहे.
तिकीट दरात वाढ होऊनंही बसचे उत्पन्न वाढत नव्हते, त्यामुळे मनपाच्या परिवहन विभागाने भरारी पथक नेमले. कंडक्टरच्या व्हॉटस्अॅप ग्रुपमुळे बसच्या तिकीटाचा काळाबाजार होत असल्याचे मनपाच्या लक्षात आले आहे. मनपाच्या आपली बसमध्ये काळाबाजार करण्यासाठी वापरण्यात येणारे २३ मोबाईल जप्त करण्यात आले आहेत. या मोबाईलद्वारे व्हॉटस्अॅपवर होत असलेल्या काळ्याबाजाराची चौकशी सुरु आहे. यात मनपाच्या परिवहन विभागातील आणखी काही मासे अडकण्याची शक्यताही वर्तवण्यात येत आहे.
