नागपूर - गर्भवती महिलेला स्वतःच्याच हाताने स्वतःची प्रसूती करावी, लागल्याचा धक्कादायक प्रकार नागपूरच्या शासकीय रुग्णालयात उघडकीस आला आहे. सुकेशनी श्रीकांत चतारे (२३, रा. दुबेनगर, हुडकेश्वर) असे या महिलेचे नाव आहे. रविवारी पहाटे सुकेशनी हिला प्रसुतीच्या वेदना व्हायला लागल्या पण शिफ्टला काम करणारे डॉक्टर झोपेत होते, असे सुकेशनी हिच्या पतीने सांगितले. त्यामुळे तिला स्वतःची प्रसूती स्वतःला करावी लागली.
त्यानंतरही शासकीय रुग्णालयातील डॉक्टर आणि परिचरिकांचा निष्काळजीपणा इतक्यावरच थांबला नाही, तर नवजात बाळ आणि आईला खाली फरशीवर झोपवण्यात आले, असे सुकेशनीचे पती श्रीकांत चतारे यांनी सांगितले. मुख्यमंत्री आणि केंद्रीय मंत्र्यांच्या शहरातील आरोग्य सेवेचा भोंगळ कारभार या घटनेने पुढे आला आहे. दरम्यान या घटनेने सामान्य जनतेतून रुग्णालय प्रशासनाच्या विरोधात संताप व्यक्त होत आहे.
नागपुरातील शासकीय वैद्यकीय महाविद्यालय रुग्णालय हे आशिया खंडातील दुसऱ्या क्रमांकाचे रुग्णालय आहे. या ठिकणी अशा प्रकारची दुर्देवी घटना घडल्याने आरोग्य सेवेवर प्रश्न चिन्ह निर्माण होत आहे.
