नागपूर - कोरोनाच्या पार्श्वभूमीवर विधान परिषद पदवीधर निवडणूक होत असल्याने प्रशासनाकडून पूर्ण तयारी करण्यात आली आहे, असे नागपूरचे जिल्हाधिकारी रविंद्र ठाकरे यांनी सांगितले. मतदारांनी मतदान केंद्रावर प्रशासनाने घालून दिलेल्या नियमांचे पालन करत मतदान करावे, असे आवाहनही यावेळी जिल्हाधिकाऱ्यांकडून करण्यात आले आहे.
पदवीधर मतदान प्रक्रिया पार पाडत असताना प्रशासनाकडून विविध नियमे आखून देण्यात आले आहेत. यासाठी मतदारांनी मतदान कसे करावे, कोणती खबरदारी घ्यावी, याबाबतची अधिकृत माहिती जिल्हाधिकारी रविंद्र ठाकरे यांनी दिली. उद्या होणाऱ्या निवडणूकीसाठी प्रशासन स्तरावर पूर्ण खबरदारी घेत तयारी करण्यात आली आहे. जिल्ह्यात एकूण 164 मतदान केंद्र आहेत. या सर्व मतदान केंद्रावर मतदानाची तयारी पूर्ण झाल्याची माहीती जिल्हाधिकाऱ्यांनी दिली आहे. शिवाय या मतदान केंद्रासाठी स्वतंत्र अधिकारी यांच्या समवेशत पोलीस देखील तैनात करण्यात आल्याचेही रविंद्र ठाकरे यांनी सांगितले आहे.
निवडणूक कोरोनाच्या पार्श्वभूमीवर असल्याने प्रत्येक मतदान केंद्राबाहेर सँनिटायझेशन, थर्मल स्क्रिनिंग आदी व्यवस्था करण्यात आली आहे. मतदानासाठी येणाऱ्या प्रत्येक मतदाराचे थर्मन स्क्रिनिंग करूनच त्याला मतदानासाठी पुढे पाठविण्यात येणार आहे. मतदारांनी मतदान केंद्रावर येतांना मोबाईल आणि पेन देखील आनू नये. शिवाय मतदान करताना निवडणूक आयोगाने लागू केलेल्या पेनचाच वापर करून मतदान करावे. असे आवाहनही जिल्हाधिकारी रविंद्र ठाकरे यांनी केले.
कोरोनाची लक्षणे असणाऱ्या मतदारांसाठी शेवटचा 1 तास -
मतदान प्रक्रियेत थर्मल स्क्रिनिंग करतांना अधिकचे तापमान आढळल्यास अथवा कोरोनाची लक्षणे असणाऱ्या मतदारांना शेवटच्या १ तासात मतदान करण्याची व्यवस्था प्रशासनाकडून करण्यात अल्याची माहीती जिल्हाधिकाऱ्यांनी दिली. शिवाय, केंद्रावर असलेल्या अधिकाऱ्यांना पीपीई किटची व्यवस्थाही करण्यात आल्याचे रविंद्र ठाकरे यांनी सांगितले.
