नागपूर - इच्छा असेल तर कुठलेही काम अशक्य नाही, असे कायम म्हटले जाते. सर्वत्र कोरोनाचे संकट गडद होत असताना बाजारात नफाखोरी करणारे धंदे जोमात आहेत. बाजारात सात ते दहा हजार रुपये किंमतीला मिळणारी ऑटोमॅटीक सॅनिटाईझर मशीन नागपूर जिल्ह्याच्या सावनेर तालुक्यातील एका प्राध्यापकाने केवळ दीडशे ते दोनशे रुपये खर्च करून तयार केली आहे. निखिल मानकर असे संशोधक प्राध्यापकाचे नाव आहे. ते सध्या आदर्श विद्यालय आणि स्वर्गीय आनंदराव पाटील केदार कनिष्ठ महाविद्यालयात व्यावसायिक अभ्यासक्रमाचे प्राध्यापक आहेत. त्यांनी केवळ मशीन तयारच केली नाही तर मशीन तयार करण्याचे कौशल्य विद्यार्थ्यांना देखील शिकवले आहे. कोविडच्या पार्श्वभूमीवर ग्रामीण भागातील लोक, शाळा, महाविद्यालये महागडे मशीन घेऊ शकत नाही, त्याठिकाणी मानकर सरांचे विद्यार्थी हे मशिन बसवून देणार आहेत.
हेही वाचा - 'ऑनलाईन' शिक्षणासाठी स्मार्ट फोन आणायचा कुठून?, शाळा सोडून विद्यार्थ्यांना जुंपलं शेतात
हे यंत्र तयार करत असताना त्यांना केवळ १५० ते २०० रुपयांचा खर्च मानकर सरांना आला आहे. या यंत्राच्या तुलनेत बाजारात मिळणारे ऑटोमॅटीक सॅनिटाईझर मशीन सात ते दहा हजार रुपयाला विकत घ्यावे लागते. मानकर सरांनी मशीन तयार करण्याचे तंत्रज्ञान आपल्या विद्यार्थ्यांना दिले असून ग्रामीण भागातील शाळांमध्ये अश्या प्रकारचे मशीन बसवण्याचा त्यांचा मानस आहे.
हेही वाचा - 'राज्यात लवकरच कौशल्य विकास विद्यापीठाची स्थापना होईल'
