नागपूर - उच्चशिक्षित झाल्यानंतर झटपट श्रीमंत होण्याची इच्छा पूर्ण करण्याच्या उद्देशाने घरफोड्या करणाऱ्या एका प्रेमी युगुलाला नागपूरच्या मानकापूर पोलिसांनी बेड्या ठोकल्या आहेत. या प्रेमी युगुलाची चोरी करण्याची पद्धत जगावेगळी असल्याने त्यांना अटक करणाऱ्या पोलिसांना कधीही त्यांच्यावर संशय आला नाही. घरफोड्या करत असल्याचा संशय कुणालाही येऊ नये यासाठी हे प्रेमी युगुल चक्क कारमधून फिरून घरफोड्या करत असल्याचे उघड झाले. त्यानंतर पोलिसांनी त्यांना अटक करून लाखोंचा मुद्देमाल जप्त केला आहे.
हेही वाचा - औषधाने मुले होतात अस सांगून दाम्पत्याला गंडवले; 3 बोगस डॉक्टर गजाआड
पोलिसांनी अटक केलेल्या प्रेमी युगुलामध्ये शैलेश वसंता डुंभरे आणि त्याची प्रेयसी प्रियाचा समावेश आहे. दोघेही लिव्हइनमध्ये राहत असल्याचे समोर आले आहे.
आरोपी शैलेश डुंभरे हा एका कंपनीत चांगल्या पदावर कार्यरत होता. झटपट श्रीमंत होण्याच्या नादात त्याने नोकरी सोडून घरफोडीचे काम सुरू केले होते. या कामात आरोपी शैलेशने त्याची प्रेयसी प्रियालासुद्धा सहभागी करून घेतले होते. प्रिया ही अमरावती जिल्ह्यातील रहिवाशी आहे. ती शिक्षणासाठी नागपुरात राहते. शैलेश आणि प्रियामध्ये गेल्या काही महिन्यांपासून दोघांमध्ये प्रेम संबंध होते. दोघेही घरफोडीच्या कामात पार्टनर झाल्याने या दोघांनी लिव्हइनमध्ये राहण्याचा निर्णय घेतला. या दोघांनी गोरेवाडा परिसरात एक बंगला भाड्याने घेतला होता. चोरी कशी करायची ज्यामुळे कुणाला संशय येणार नाही, हे जाणून घेण्यासाठी त्यांनी चक्क यू-ट्युबवरून घरफोडीचे प्रशिक्षण घेतल्याचे समोर आले आहे.
हेही वाचा - भांडगाव येथे घरफोडी करून दागिन्यांसह रोख रक्कम लंपास
यू-ट्युबवर प्रशिक्षण घेतल्यानंतर प्रॅक्टिकल करण्यासाठी त्यांनी स्वतःच्याच घरी चोरी केली. त्यांचा पहिला प्रयोग यशस्वी झाल्यानंतर त्यांनी शहरातील विविध परिसरात घरफोडी करायला सुरुवात केली. पहिली घरफोडी यशस्वी झाल्यानंतर त्यांचा आत्मविश्वास वाढला. त्यानंतर त्यांनी नागपूर शहरात घरफोड्यांचा सपाटा लावला. ज्यामुळे पोलिसांची झोप उडाली होती.
अशी करायचे चोरी -
या दोघांनाही आलिशान जीवन जगण्याची इच्छा होती, म्हणून त्यांनी चोऱ्या करून हा पैसा उभा करण्याचे काम सुरू केले होते. घरफोड्या करताना कुणालाही संशय येऊ नये यासाठी हे दोघेही एका कारमधून घरफोड्या करायला जायचे. कारमधून आल्याने त्यांच्यावर कुणालाही संशय येत नसे, पण मानकापूर भागात झालेल्या अनेक चोऱ्यांमध्ये त्याच गाडीचा उल्लेख अनेकांनी केल्याने पोलिसांनी केसरी रंगाच्या गाड्यांची यादी तयार करून त्यांच्या मालकांच्या हालचालींवर लक्ष केंद्रित केले. बंगल्यातील कारमालक घरफोडी कशाला करेल, असा प्रश्न पोलिसांनाही पडला. त्यानंतर पोलिसांनी कारवर आणि शैलेश, प्रियावर पाळत ठेवली. एक दिवस ते दोघे कारमधून रात्री चोरीच्या हेतूने बंगल्याबाहेर पडले. त्यावेळी पोलिसांनी त्यांना ताब्यात घेऊन चौकशी केली. सुरुवातीला त्यांनी उडवाउडवीचे उत्तरे दिली. मात्र, पोलिसांनी हिसका दाखवताच त्यांनी गुन्हा कबूल केला आहे.
