नागपूर Indian women climbers : माउंट एव्हरेस्ट सर करणारी पहिली भारतीय महिला पद्मभूषण बचेंद्री पाल यांच्या नेतृत्वात १३ भारतीय साहसी महिलांच्या पथकानं अरुणाचल प्रदेशातील गोरिचेन ग्लेशियरवर १६ हजार ५०० फूट चढाई केली. या पथकात ५० ते ८५ वयोगटातील गिर्यारोहक महिला असून नागपूरच्‍या गिर्यारोहक बिमला देऊस्‍कर यांचा देखील समावेश आहे. टाटा स्टील अडव्हेंचर फाऊंडेशनने आर्मी अडव्हेंचर आणि इन्क्रेडिबल इंडिया डेस्टिनेशन अरुणाचल प्रदेश यांच्या सहकार्याने 'समिट्स अँड स्टीअरिंग व्हील' या नावाने ही मोहीम आखली गेली होती. यात ५० ते ८५ वयोगटातील गिर्यारोहक महिला सहभागी झाल्‍या होत्‍या. पद्मश्री बचेंद्री पाल यांच्यासह पद्मश्री चंद्रप्रभा ऐतवाल (८२), वसुमती श्रीनिवासन (७०), बिमला देऊस्‍कर (५६), मेजर कृष्णा दुबे (५७), गंगोत्री इंदुमती (६४), पायो मुर्मू (५५), कमांडंट सीमा टोलिया (५२), एल. अन्नपूर्णा (५३), सुषमा बिसा (५७), आशा तोमर (६७), मीनाक्षी पोपाली (६७) आणि शिल्पा (६१) यांचा समावेश होता.
अपघातातून बरं झाल्यानंतर मोहिम फत्‍ते : प्रसिद्ध गिर्यारोहक आणि १४ एव्हरेस्ट गिर्यारोहकांना प्रशिक्षण देणाऱ्या राष्ट्रीय साहसी पुरस्कार प्राप्त बिमला देऊस्‍कर यांनी मागील वर्षी ट्रान्स हिमालयन ट्रेकमध्‍ये सहभाग घेतला होता. त्‍यात बिमला यांना अपघात झाला व हिप बोन फ्रॅक्चर झालं होतं. त्‍यांच्‍यावर डॉ. निर्भय करंदीकर यांनी यशस्वी शस्त्रक्रिया केली होती. त्‍यातून बऱ्या होत बिमला यांनी या मोहिमेत अतिशय हिंमतीनं आणि आत्‍मविश्‍वासानं सहभागी होत, ही मोहीम देखील फत्‍ते केली.
धेर्यानं आणि चिकाटीनं ही मोहीम पूर्ण केली : ११ ऑक्टोबर २०२३ रोजी निमस, दिरंग येथून आर्मी अडव्हेंचर सेलचे संचालक कर्नल चौहान यांनी हिरवा झेंडा दाखवून मोह‍िमेला प्रारंभ केला होता. त्यानंतर महिला पथकानं काही अतिदुर्गम आणि खडतर मार्गावरून मार्गक्रमण करीत बोमडी ला, सेला पास आणि बुमला मार्गे प्रवास करत आणि जिमिथांग गोरसम चोरटेन मठ आणि तवांग मठ यासारख्या आध्यात्मिक आणि ऐतिहासिक स्थळांना भेट देत ही कामगिरी केली. सर्व महिला ५० वर्षांपेक्षा जास्त वयाच्या होतो. सर्वांनी अतिशय धेर्याने आणि चिकाटीने ही मोहीम पूर्ण केली.
बिमला सर्व महिलांसाठी ‘रोल मॉडेल’ ठरल्‍या : शारीरिक आणि मानसिक धैर्याची परीक्षा घेणा-या या मोहिमेत बिमला देऊस्‍कर यांच्यासह इतर सर्व महिलांनी सामाजिक रूढीपरंपराही मोडीत काढत जागतिक स्तरावर महिलांना स्वप्नांचा पाठपुरावा करण्यासाठी प्रेरित केले आहे. दुखापतीतून सावरून १६ हजार ५०० फूट चढाई करणा-या बिमला सर्व महिलांसाठी ‘रोल मॉडेल’ ठरल्‍या आहेत.
हेही वाचा :
- Diwali 2023 Special story : बचत गटाच्या माध्यमातून आदिवासी महिलेचा पर्यावरणपूरक व्यवसाय; गायीचा शेणापासून केली 'या' वस्तुंची निर्मिती
- Kersuni Special Story : केरसुणी बनवून घरोघरी विकणारे आजही दारिद्र्याच्या अंधारात!
- Mayank chaphekar Special Story : आईनं सोनं, वडिलांनी दुचाकी विकून घडविलं मयंकचं करियर; एशियन गेमनंतर ऑलिंपिककरिता सुरू आहे तयारी
