नागपूर - मँच मेकिंग या लग्न जुळवणाऱ्या वेबसाईटवरून नागपुरात एका प्राध्यापिका महिलेने सहा जणांना फसवल्याचे उघड झाले आहे. सहा लग्न करून पतींकडून लाखो रुपये उकळणाऱ्या या महिलेविरुद्ध मानकापूर पोलिसांनी गुन्हा दाखल केला आहे. विशेष म्हणजे या महिलेच्या टोळीत गुंड, डॉक्टर आणि राजकीय नेत्यांचाही समावेश आहे. समीरा उर्फ सीमा मुक्तार अहमद अन्सारी असे या आरोपी महिलेचे नाव आहे. ती नागपूरच्या मोमीनपुरा येथील इस्लामिया हायस्कूल आणि कनिष्ठ महाविद्यालयात शिक्षिका आहे.
यापूर्वी समीराचं 2010 मध्ये भिवंडी येथील इमरान अन्सारीसोबत लग्न झाले होते. समीराला त्याच्यापासून 8 वर्षांचा एक मुलगा आहे. इमरानसोबत तिचे न पटल्याने त्याने तिला घटस्फोट दिला. त्यानंतर तिने 16 एप्रिल 2013 ला यशोधरानगर येथील नजमून शाकीब याच्याशी लग्न केले. काही दिवसातच तिने नजमूनला सोडले. त्यानंतर शादी डॉटकॉमवर तिची ओळख औरंगाबाद येथील मुदस्सर मोमीन याच्याशी झाली. 3 सप्टेंबर 2017 ला दोघांनीही लग्न केले. मुदस्सर हा औरंगाबाद येथे टीव्ही मॅकनिक होता. लग्न करण्यापूर्वीच तिने मुद्दस्सरला नागपूरला बोलावून घेतले. वास्तविक पाहता समीराचं हे पाचवे लग्न होते. मात्र, तिने दुसरे लग्न असल्याचे सांगून मुद्दस्सरसोबत लग्न केले होते.
लग्न जुळल्यानंतर तिने मुद्दस्सरकडून एक लाख रुपये घेतले होते. काही दिवस चांगले गेल्यानंतर त्यांच्यात बिनसले. त्यानंतर त्याच्याविरूद्ध बलात्काराचा गुन्हा दाखल करून त्याला ब्लॅकमेल केले. विविध नाव धारण करून समीरा ही घटस्फोटीत तरुणांना हेरत होती. त्यानंतर त्यांच्याशी लग्न करून काही दिवसातच घटस्फोट घ्यायची. त्यानंतर तिच्या टोळीत असलेले राजकीय नेते, तोतया पोलीस, शिक्षक आणि गुंड हे तिच्या पतीला पोलीस असल्याची बतावणी करून दमदाटी करायचे. त्याचप्रमाणे खून करण्याची देखील धमकी द्यायचे.
तिच्या टोळीत नेते आणि गुंडांचा सहभाग असून त्यांच्या भरवशावर ती असे कृत्य करायची. या महिलेची टोळी मॅच मेकिंग साईड्सवर जाऊन श्रीमंत व्यक्तींना हेरायची आणि नंतर महिला त्याच्याशी लग्न करून त्यांना ब्लॅकमेल करायची.
