नागपूर - गुजरातमध्ये निर्माण होणारे रेमडेसीवीर इंजेक्शन हे तेथील लोकांना मिळावे व दुसऱ्या राज्याला ते मिळू नये, अशा पद्धतीची भाजपची भूमिका माणुसकीला न शोभणारी आहे. यामुळे गुजरातमध्ये निर्माण होणारे हे इंजेक्शन भाजप कार्यालयाला पोहोचवले जाते. मेलेल्याच्या टाळूवरील लोणी खाण्याचे राजकारण भाजप करत आहे. याचा निषेध करत काँग्रेसचे प्रदेशाध्यक्ष नाना पटोले म्हणाले की, माणुसकी असती तर देश कोरोनामुक्त राहिला असता. ते नागपूरच्या कोरोना परिस्थितीचा आढावा घेण्यासाठी जिल्हाधिकारी कार्यालयात आले होते. यावेळी ते माध्यमांशी बोलत होते.
महापालिकेकडून प्रतिबंधात्मक कारवाई व्हायला पाहिजे होती ती झाली नाही. लसीकरण झाले असते तर या महामारीला लढा देत आला असता. पण, लसीकरण न झाल्याने ही परिस्थिती उद्भवली आहे. नागपुरात परिस्थिती गंभीर होत चालली आहे. रुग्णांना बेड मिळत नाही. कोरोनाची साखळी तोडण्याच्या अनुषंगाने प्रशासनाला सूचना दिल्या आहेत, प्रशासनाने त्या पद्धतीने काम केले तर ही साखळी तोडण्यास मदत होईल, असेही ते म्हणाले.
दोन दिवसांत टाळेबंदीबाबत निर्णय
मुख्यमंत्री टाळेबंदीचा निर्णय घेणार आहेत. कोरोनाची साखळी तोडण्यासाठी काही कडक निर्बंध घालावेच लागणार आहेत. दोन दिवसांत टाळेबंदीबाबत निर्णय घेतला जाईल, असे काँग्रेसचे प्रदेशाध्यक्ष नाना पटोले म्हणाले.
तालुका स्तरावर कोविड सेंटर निर्माण
ग्रामीण भागातील परिस्थितीबाबत तालुका स्तरावर कोविड सेंटर निर्माण झाले आहेत. ज्या ठिकाणी रुग्ण मिळत आहेत, ती ठिकाणे प्रतिबंधित क्षेत्र म्हणून घोषित करण्याच्या सूचना दिल्या असल्याचेही पटोले म्हणाले.
हेही वाचा - बेड आणि रेमडेसिवीर इंजेक्शनच्या व्यवस्थापनात समन्वय ठेवा - पालकमंत्री डॉ. नितीन राऊत
