नागपूर - माध्यमिक व उच्च माध्यमिक शिक्षण मंडळाद्वारे जाहीर करण्यात आलेल्या बारावी परीक्षेच्या निकालात नागपूर महानगरपालिका शाळांमध्ये शिकणाऱ्या विद्यार्थ्यांनी घवघवीत यश संपादन केले आहे. मागील वर्षीच्या तुलनेत यंदा निकालात २६ टक्क्यांनी वाढ झाली असून, यंदाच्या तीनही शाखा मिळून निकालाची टक्केवारी ८८.०८ इतकी आहे.
जाहीर झालेल्या निकालानुसार मनपाच्या शाळांमध्ये शिक्षण घेणाऱ्या विज्ञान शाखेतील उत्तीर्ण विद्यार्थ्यांची टक्केवारी ९४.७० इतकी आहे. कला शाखेच्या निकालाची टक्केवारी ८८.०६ तर वाणिज्य शाखेच्या निकालाची टक्केवारी ७३.७७ इतकी आहे. तीनही शाखांमध्ये एकूण २६३ विद्यार्थी शिक्षण घेत होते, त्यापैकी २६० विद्यार्थ्यांनी परीक्षा दिली. २२९ विद्यार्थी उत्तीर्ण झाले आहेत. विज्ञान शाखेतून एम. ए. के. आझाद उर्दू कनिष्ठ महाविद्यालयाची विद्यार्थिनी मनताशाह परवीन हिने ६५० पैकी ४७५ (७३.०८%) गुण प्राप्त करीत मनपा शाळांतील विद्यार्थ्यांमध्ये प्रथम येण्याचा मान पटकाविला आहे.
विज्ञान शाखेतून साने गुरुजी उर्दू कनिष्ठ महाविद्यालयाची हयात कौसर समीउज्जमा हिने ४६१ (७०.९२%) गुण मिळवून दुसरा तर साने गुरुजी उर्दू कनिष्ठ महाविद्यालयाचीच नगमा परवीन मो. अफजल हसन हिने ४४० (६७.६९%) गुण प्राप्त करीत तिसरा क्रमांक पटकाविला आहे. वाणिज्य शाखेतील प्रथम तीनही विद्यार्थी एम.ए.के. आझाद उर्दू कनिष्ठ महाविद्यालयाचे आहेत. कला शाखेतून एम.ए.के. आझाद उर्दू कनिष्ठ महाविद्यालयाची अशिया फरहीन हिने ४६३ (७१.२३%) गुण प्राप्त करीत मनपा शाळेतून प्रथम क्रमांक पटकाविला.
बिस्मणी महेश धुर्वे हिने ४५२ (६९.५४%) गुण प्राप्त करीत द्वितीय तर अंकित रमेश चन्ने ह्याने ४३९ (६७.५४%) गुण प्राप्त करीत तृतीय क्रमांक पटकाविला. हे दोन्ही विद्यार्थी डॉ. बाबासाहेब आंबेडकर कनिष्ठ महाविद्यालयात शिक्षण घेत होते. याच महाविद्यालयाचा रोहन हिरामण मेश्राम या विज्ञान शाखेच्या विद्यार्थ्याने ३९० (६०%) गुण प्राप्त करून दिव्यांगांमध्ये प्रथम येण्याचा मान पटकाविला.
