नागपूर Assembly Winter Session 2023 : विधिमंडळाच्या हिवाळी अधिवेशनाला उपराजधानी नागपुरात आजपासून सुरुवात झाली आहे. त्यामुळं राज्यातील दिग्गज नेत्यांनी नागपुरात तळ ठोकला आहे. अधिवेशनाच्या पहिल्या दिवशी शेतकरी आत्महत्या, दुष्काळ बेरोजगारी, महागाई, ओबीसी आणि मराठा आरक्षणाचा तिढा, या विषयावरुन महाविकास आघाडीच्या नेत्यांनी सरकारला घेरलं. विरोधकांनी आक्रमक होत गळ्यात संत्र्यांच्या माळा घालून विधानसभेच्या पायऱ्यावर आंदोलन केलं. यावेळी विरोधकांनी जोरदार घोषणाबाजी करुन विधिमंडळ दणाणून सोडलं.
कर्जमाफीसाठी विरोधक आक्रमक : शेतकऱ्यांच्या कर्जमाफीसाठी विरोधक विधिमंडळाच्या हिवाळी अधिवेशनात चांगलेच आक्रमक झाले. त्यासाठी विरोधकांनी विधिमंडळावर मोर्चा काढला. हिवाळी अधिवेशनाच्या पहिल्याच दिवशी विधिमंडळावर मोर्चा काढल्यानं विरोधकांनी आपले मनसुबे दाखवून दिले आहेत. विधिमंडळाच्या पायऱ्यावर बसून विरोधकांनी आंदोलन सुरू केलं आहे. विरोधी पक्षनेते विजय वडेट्टीवार, अंबादास दानवे, नाना पटोले, जयंत पाटील, बाळासाहेब थोरात, आदी सगळ्याच विरोधी पक्षातील नेत्यांनी आक्रमक पवित्रा घेत आंदोलन केलं आहे. यावेळी विरोधकांनी गळ्यात संत्र्यांची माळा घालून विधिमंडळाच्या पायऱ्यावर आंदोलन केलं.
राष्ट्रवादीच्या दोन्ही गटाचे नेते बसणार एकाच कार्यालयात : शिवसेना पक्षात उभी फूट पडल्यानंतर एकनाथ शिंदे यांनी भाजपासोबत सत्ता स्थापन केली. त्यानंतर अजित पवार यांनीही राष्ट्रवादीत बंड केल्यानं राज्याच्या राजकारणात मोठा भूकंप आला होता. सध्या राष्ट्रवादीच्या शरद पवार गटाचे आमदार आणि उपमुख्यमंत्री अजित पवार यांच्या गटाचे आमदार नागपूर हिवाळी अधिवेशनासाठी दाखल झाले आहेत. मात्र हिवाळी अधिवेशनात शरद पवार गटाच्या आमदारांना वेगळं दालन देण्यात आलेलं नाही. त्यामुळे उपमुख्यमंत्री अजित पवार यांच्या गटातील आणि शरद पवार यांच्या गटातील आमदार एकाच दालनात बसणार असल्याचं स्पष्ट झालं आहे.
राष्ट्रवादीच्या नेत्यांनी दावाच केला नाही : विधिमंडळाच्या हिवाळी अधिवेशनात काँग्रेस आणि राष्ट्रवादीच्या नेत्यांनी सत्ताधारी भाजपा आणि शिवसेना शिंदे गटाला घेरण्याची तयारी सुरू केली आहे. मात्र दुसरीकडं राष्ट्रवादी काँग्रेसमध्ये दोन गट पडूनही शरद पवार गटाच्या नेत्यांनी अधिवेशनात वेगळ्या दालनाची मागणी केली नाही. त्यामुळे राष्ट्रवादीत कोणतेही गट तट नसल्याच्या शरद पवार यांच्या दाव्याला पुष्टीच मिळाली आहे. राष्ट्रवादीच्या शरद पवार यांच्या गटाकडून वेगळ्या दालनाची मागणी करण्यात आली नसल्याची माहिती सूत्रांनी दिली आहे. त्यामुळे राष्ट्रवादीला नागपूर हिवाळी अधिवेशनात एकच दालन देण्यात आलं आहे. मात्र या दालनावर आमदार जितेंद्र आव्हाड यांच्या नावाची असलेली पाटी काढून टाकण्यात आली आहे.
नवाब मलिक सत्ताधारी बाकावर : जामीनावर बाहेर आलेले राष्ट्रवादीचे आमदार नवाब मलिक यांनी आज नागपूर हिवाळी अधिवेशनाला हजेरी लावली. यावेळी त्यांनी अजित पवार गटाचे नेते अनिल पाटील यांची भेट घेतली. नवाब मलिक राष्ट्रवादीच्या कोणत्या गटाला पाठींबा देणार, याविषयी उलटसुलट चर्चा सुरू होत्या. याविषयी राष्ट्रवादी शरद पवार गटाचे नेते जयंत पाटील यांना विचारलं असता, त्यांनी हा नवाब मलिक यांचा निर्णय असल्याचं स्पष्ट केलं. मात्र नवाब मलिक यांनी अजित पवार गटाचे नेते अनिल पाटील यांची भेट घेतल्यानं चर्चेला उधाण आलं. त्यातचं नवाब मलिक हे सत्ताधारी बाकावर जाऊन बसल्यानं नवाब मलिक अजित पवार गटात असल्याची चर्चा सध्या तरी सुरू आहे.
हेही वाचा :
