मुंबई - अश्लील चित्रफित प्रकरणी अभिनेत्री शिल्पा शेट्टीचा पती राज कुंद्रा सध्या अटकेत आहे. याप्रकरणी मुंबई पोलिसांच्या गुन्हे शाखेने बुधवारी (दि. 15 सप्टेंबर) 1 हजार 467 पानांचे पुरवणी दोषारोपपत्र न्यायालयात सादर केले होते. राज कुंद्रा यांनी 2015 मध्ये वियान इंडस्ट्रीज नावाची कंपनी सुरू केली होती. यात राज यांची पत्नी अभिनेत्री शिल्पा शेट्टी ही 24.50 टक्क्यांची भागधारक होती. 2019 पर्यंत ती या कंपनीत भागधारक होती. 2020 मध्ये शिल्पा शेट्टीने आपल्या पदाचा राजीनामा दिला होता. आपण कामात व्यस्त असल्याने राज कुंद्रा चालवत असलेल्या अॅप किंवा अश्लील चित्रफित संदर्भात काहीच माहित नाही, असा जबाब शिल्पा शेट्टीने नोंदविला आहे.
दरम्यान, पॉर्न रॅकेट प्रकरणी अटकेत असलेल्या अभिनेत्री शिल्पा शेट्टीचा पती आणि उद्योगपती राज कुंद्रा याला जामीन मंजूर झाला आहे. मुंबई पोलिसांच्या गुन्हे शाखेने १४६७ पानांचे पुरवणी आरोपपत्र सादर केल्यानंतर त्याने मुंबई सत्र न्यायालयातून त्याचा जामीन अर्ज मागे घेतला होता. त्यानंतर त्याने पॉर्नोग्राफी प्रकरणात मुंबई पोलिसांनी पुरवणी आरोपपत्र दाखल केल्यानं त्याच आधारावर कुंद्रा जामीनासाठी दावा दाखल केला होता. अखेर त्याला 50 हजार रुपयांच्या जातमुचलक्यावर जामीन मंजूर झाला आहे.
काम देण्याचे बहाण्याने अश्लिल चित्रफिती
चित्रपट सृष्टीत काम करण्यास इच्छुक तरुणींना काम देण्याचे बहाण्याने अश्लिल चित्रफिती बनवून त्या एका अॅपवर प्रसारीत करणाऱ्या पॉर्न फिल्म प्रोडक्शन कंपनीबाबत माहिती प्राप्त झाल्याने 4 फेब्रुवारी, 2021 रोजी मालमत्ता कक्ष, गुन्हे शाखेने मालवणी पोलीस ठाण्यात दाखल केला होता. त्यानंतर पाच जणांना अटक करण्यात आली होती. तपासादरम्यान नऊ आरोपींना अटक करुन त्यांच्या विरोधात 1 एप्रिल, 2021 रोजी न्यायालयात एकूण 3 हजार 529 पानांचे दोषारोपत्र दाखल करुन कलम 173 (8) अन्वये पोलीस तपास करत होते.
पॉर्न फिल्मबाबत बरेच पुरावे
पॉर्न केसमधील मुख्य सूत्रधाराचा मालमत्ता कक्षामार्फत तपास सुरू असताना तपासादरम्यान तांत्रिक विश्लेषण, साक्षीदारांचे जबाब व जप्त कागदपत्रांवरुन एका अॅपचा सूत्रधार राज कुंद्रा हाच असल्याचे आढळून आले. न्यायालयाकडून सर्च वॉरन्ट प्राप्त करून राज कुंद्रा यांच्या अंधेरी येथील कार्यालयाची झडती घेतली. त्यामध्ये पॉर्न फिल्मबाबत बरेच पुरावे प्राप्त झाले. त्याआधारे रिपू सुदन कुंद्रा उर्फ राज कुंद्रा व त्याचे विआन इंडस्ट्रीज कंपनीतील आय.टी. हेड रायन जॉन थॉर्प यांना या प्रकरणी 19 जुलै, 2021 रोजी अटक करण्यात आली होती. त्यापूर्वी दोघांना अश्लील चित्रफीत बनवून, ऑनलाइन प्रसारीत करुन, पैसे मिळवून व्हॉट्सअॅप व इ-मेल नष्ट केल्याप्रकरणी अटक केली होती.
एकूण 4 हजार 996 पानांचे दोषारोपपत्र
या प्रकरणी अटक आरोपी राज कुंद्रा व रायन जॉन थॉर्प तसेच सिंगापूर येथे राहणारा आरोपी यश ठाकूर उर्फ अरविंदकुमार श्रीवास्तव व लंडन येथे राहणारा परदिप बक्शी यांच्या विरोधात न्यायालयात बुधवारी (दि. 15 सप्टेंबर) 1 हजार 467 पानांचे पुरवणी दोषारोपपत्र दाखल करण्यात आले आहे. या प्रकरणात 13 आरोपींविरोधात एकूण 4 हजार 996 पानांचे दोषारोपपत्र न्यायालयात सादर करण्यात आले आहेत. याप्रकरणी पुढील तपास सुरू असल्याची माहिती मुंबई पोलिसांनी दिली आहे.
2019 मध्ये ईडीने केली होती राज कुंद्राची चौकशी
इक्बाल मिर्ची प्रकरणात अटक करण्यात आलेल्या रणजीत सिंग बिंद्रा या आरोपीच्या जबाबावरुन कुंद्रा याचे नाव समोर आले आहे. कुंद्रा याचे इक्बालसोबत संबंध असल्याचा ईडी (सक्त वसुली संचालनालय) अधिकाऱ्यांना संशय आहे. 2011 मध्ये आर.के.डब्ल्यू. नावाची कंपनी कुंद्रा यांनी विकत घेतली होती. याबरोबरच मुंबईतील विमानतळाजवळ एक भूखंडही कुंद्रा यांनी खरेदी केला होता. मात्र, या प्रकरणात आपले इक्बालसोबत कुठलेही संबंध नव्हते, असे म्हणत कुंद्रा यांनी सर्व आरोप फेटाळून लावले होते.
हेही वाचा - प्रवीण दरेकर यांच्या वक्तव्याचा मी निषेध करते - सुरेखा पुणेकर
