धर्मांतर केल्यानंतर आदिवासी समाजाचा लाभ मिळणार का? मंत्री लोढांची महत्त्वपूर्ण घोषणा

Mangal Prabhat Lodha : महाराष्ट्र विधिमंडळाचे हिवाळी अधिवेशन नागपूरला सुरू आहे. अधिवेशनाच्या दुसऱ्या आठवड्यातील चौथ्या दिवशी विधान परिषद सभागृहामध्ये आदिवासी समाजाच्या धर्मांतरबाबतच्या प्रश्नावरून गदारोळ पाहायला मिळाला होता. या संदर्भात आदिवासी धर्मांतर करणाऱ्या व्यक्तीला लाभ द्यायचा की, नाही याविषयी समिती स्थापन करून अभ्यास करणार असल्याची घोषणा मंत्री मंगल प्रभात लोढा यांनी केलीय.

मुंबई/नागपूर Mangal Prabhat Lodha : आदिवासी समाजातील व्यक्तीने इतर धर्म स्वीकारला तर त्यांना आदिवासी समाजाला मिळणारे लाभ मिळू नये, अशा प्रकारची मागणी विधान परिषद सभागृहामध्ये भाजपा आमदार निरंजन डावखरे यांनी लक्षवेधीच्या माध्यमातून सरकारकडे केली. आदिवासी समाजामध्ये मोठ्या प्रमाणावर धर्मांतराचे प्रमाण वाढत चालले आहे. आदिवासी समाजाला आपला धर्म सोडून मुस्लिम किंवा इतर धर्म स्वीकारण्यास भाग पाडले जात असल्याचा आरोपही डावखरे यांनी यावेळेस केला. तसेच वेगवेगळ्या प्रकारे भूलथापा देऊन, वेगवेगळ्या प्रकारचे प्रलोभन देऊन आणि आदिवासी समाजाच्या अज्ञानाचा फायदा घेऊन अंधश्रद्धेचा वापर करून धर्मांतर केले जात असल्याचा खळबळजनक दावा विधान परिषद विरोधी पक्ष नेते अंबादास दानवे यांनी केला. तर धर्मांतर करून आदिवासी समाजाच्या सवलती लाटत असल्याचा आरोप भाजपा आमदार गोपीचंद पडळकर यांनी केला आहे. कारण अशा प्रकारच्या अनेक घटना समोर आल्या असून धर्मांतर विरोधी कायदा करणार का? असा सवालही पडळकर यांनी विधान परिषद सभागृहात केला.

निवृत्त कुलगुरूंच्या अध्यक्षतेखाली समिती नेमणार : आदिवासी धर्मांतराच्या लक्षवेधीला उत्तर देताना मंत्री मंगल प्रभात लोढा म्हणाले की, आदिवासी धर्मांतर करणाऱ्या व्यक्तीला लाभ द्यायचा की, नाही याविषयी समिती स्थापन करून अभ्यास करणार आहे. आदिवासी समाजाच्या न्याय हक्कासाठी सरकार कटिबद्ध आहे. आदिवासी समाजात धर्मांतर करून काही लोक आदिवासी समाजाला लाभांपासून वंचित ठेवत आहेत. मूळ आदिवासी समाज सोडून एखादा व्यक्ती धर्मांतर करतो तेव्हा तो अल्पसंख्यांकांचाही आणि आदिवासी समाजाचा देखील लाभ घेतो. अशावेळी आदिवासी समाजाच्या लाभांवर गदा येते. यासाठी कारवाईबाबतचा विचार केला जाईल.

'हा' विषय आदिवासी समाजाच्या अस्मितेचा : जबरदस्तीने धर्मांतर करण्यासंदर्भात केंद्र सरकार निर्णय घेणार आहे. धर्मांतराच्या माध्यमातून जे लोक लाभ घेत आहे, त्याबाबत माहिती घेणं गरजेचं असल्याचं लोढा म्हणाले. हा विषय आदिवासी समाजाच्या अस्मितेचा विषय असल्याचं त्यांनी पुढे म्हटलं. यावर शिक्षक मतदार संघाचे आमदार कपिल पाटील यांनी हरकतीत धर्मावर आधारित समाजाची आकडेवारी चुकीची असल्याचं म्हणत आपण धर्माधारित लेखी उत्तर मागे घ्यावं अशी मागणी केली. याला उत्तर देताना लोढा म्हणाले की, सदरची आकडेवारी आदिवासी विभागाकडून मिळालेली आहे. मात्र याप्रकरणी निवृत्त कुलगुरूंच्या अध्यक्षतेखाली समिती नेमण्यात येईल. धर्मांतर केलेल्या व्यक्तीला आदिवासी समाजाचा लाभ देण्यात यावा की, नाही याविषयी समिती अभ्यास करणार अशा प्रकारची घोषणा मंत्री मंगल प्रभात लोढा यांनी विधानपरिषद सभागृहात केली.

हेही वाचा -