हैदराबाद - कोरोनाच्या दुसऱ्या लाटेने देशात आधीच्या तुलनेत मोठ्या प्रमाणात हाहाकार माजवला. अनेकांची कुटूंब उद्धस्त झाली. तर अनेकांनी आपल्या जवळच्यांना गमावले. यानंतर आता देशातील कोरोनाच्या रुग्णसंख्येत घट होताना दिसत आहे. मात्र, आता डेल्टा व्हेरीएन्ट नावाचे कोरोना विषाणूचे नवीन रुप समोर आले आहे. कोरोनावरील लशीला आणि अँटीबॉडीजला डेल्टा प्लस जुमानत नाही, अशी शक्यता वर्तवण्यात येत आहे. इतका हा विषाणू भयानक आहे. कोरोनाच्या संभाव्य तिसऱ्या लाटेचा धोका तज्ञांनी व्यक्त केला आहे. या लाटेला डेल्टा प्लस कारणीभूत ठरण्याची शक्यता वर्तविण्यात येत आहे.
महाराष्ट्रात डेल्टा प्लसचे २१ रुग्ण
डेल्टा प्लस विषाणूची लागण झालेले २१ रुग्ण महाराष्ट्रात आढळून आले आहेत. त्यातील ९ रुग्ण रत्नागिरी येथे, जळगाव येथे ७, मुंबई येथे २ आणि पालघर, सिंधुदुर्ग, ठाणे येथील प्रत्येकी १ रुग्ण आहे. या विषाणूच्या तपासणीसाठी राज्यभरातून सुमारे ७५०० नमुने तपासणीसाठी पाठविण्यात आल्याची माहिती आरोग्यमंत्री राजेश टोपे यांनी सोमवारी दिली होती. दरम्यान, डेल्टा प्लसमुळे देशात रुग्णाचा पहिला मृत्यू हा मध्य प्रदेशमध्ये झाला आहे.
काय आहे डेल्टा प्लस व्हेरिएन्ट?
भारतात सर्वप्रथम आढळून आलेल्या डेल्टा म्हणजेच बी. १.६१७.२ या कोरोना विषाणू उत्परिवर्तनात आणखी उत्परिवर्तन घडून विषाणूचा डेल्टा प्लस हा नवा व्हेरियंट तयार झाला आहे. मोनोक्लोनल अँटिबॉडी कॉकटेल उपचार पद्धती या विषाणूचा प्रतिकार करते की नाही, हे समजून घेण्यासाठी संशोधन सुरू आहे.
कोरोना विषाणू हा वारंवार आपले रुप बदलताना दिसून येत आहे. आधी आफ्रिका, मग लंडन आणि अशाच काही देशांनंतर भारतातही या विषाणूचे नवे स्ट्रेन दिसून आले आहेत. भारतातील या स्ट्रेन्सना डेल्टा आणि काप्पा अशी नावं देण्यात आली होती. यामधील डेल्टा स्ट्रेनचा 'डेल्टा प्लस' हा व्हेरिएंट अधिक घातक असल्याचे डॉक्टरांचे म्हणणे आहे. तसेच, कोरोनावर उपचारासाठी वापरण्यात येणाऱ्या औषधांचा या व्हेरिएंटवर कितपत परिणाम होतो याबाबतही साशंकता असल्याचे डॉ. शीतल वर्मा यांनी म्हटले आहे. त्या केजीएमयूमध्ये मायक्रोबायोलॉजिस्ट आहेत.
डेल्टा प्लसने तिसऱ्या लाटेचा धोका-
डॉ. वर्मा यांनी सांगितले, की भारतात आलेल्या दुसऱ्या लाटेला हा डेल्टा (बी.१.६१७.२) व्हॅरिएंटच कारणीभूत होता. आता दुसऱ्या लाटेची तीव्रता कमी झाली असली, तरी डेल्टा व्हॅरिएंटही 'डेल्टा प्लस' मध्ये रुपांतरीत झाला आहे. जर लोकांनी आवश्यक ती खबरदारी नाही बाळगली, तर या व्हॅरिएंटमुळेच देशात तिसरी लाटही येऊ शकेल. दुसऱ्या लाटेमध्ये उपचारासाठी वापरण्यात आलेल्या प्लाझ्मा थेरपी, रेमडेसिवीर आणि स्टेरॉईड थेरपी अशा उपचारांचा परिणाम नंतर दिसून आला नाही. त्यामुळे ही उपचार पद्धती आता बंद करण्याचा सल्ला आयसीएमआरने दिला होता.
तिसऱ्या लाटेबाबत एम्सचा इशारा-
महाराष्ट्र टास्क फोर्सने कोरोनाची तिसरी लाट येण्याचा इशारा दिल्यानंतर एम्सनेही तिसऱ्या लाटेचा इशारा दिला आहे. जर कोरोनाच्या काळात योग्य नियमांचे पालन करणे व गर्दी टाळणे नाही केल्यास कोरोनाची तिसरी लाट अटळ आहे. येत्या सहा ते आठ आठवड्यांमध्ये कोरोनाची तिसरी लाट येऊ शकते असा इशारा एम्सचे संचालक रणदीप गुलेरिया यांनी शनिवारी दिला आहे.
महाराष्ट्रामध्ये कोरोनाने ४७ वेळा बदलले रुप..
महाराष्ट्रात केलेल्या संशोधनानुसार, तीन महिन्यांच्या कालावधीमध्ये वेगवेगळ्या जिल्ह्यांमध्ये कोरोनाची वेगवेगळी रुपं पहायला मिळाली. प्लाझ्मा, रेमडेसिवीर आणि स्टेरॉईडयुक्त औषधांच्या अतीवापरामुळे कोरोना विषाणूचे मोठ्या प्रमाणात म्युटेशन झाल्याचा संशोधकांचा अंदाज आहे. यामुळेच दुसऱ्या राज्यांमध्येही सीक्वेन्सिंग करण्याची गरज संशोधकांनी व्यक्त केली आहे. पुण्यातील नॅशनल इन्स्टिट्यूट ऑफ व्हायरोलॉजी (एनआयव्ही), आयसीएमआर आणि दिल्लीतील एनसीडीसी यांनी संयुक्तपणे हे संशोधन केले आहे. मुंबईत डेल्टा प्लस व्हेरिएंटचा एकही रुग्ण आढळून आलेला नाही. मात्र, मुंबईच्या बाजूच्या शहर आणि जिल्ह्यात म्हणजेच एमएमआर क्षेत्रात डेल्टा प्लसचे रुग्ण समोर आले आहेत. यामुळे काळजी घेण्याची गरज असल्याचे पालिकेचे अतिरिक्त आयुक्त सुरेश काकाणी यांनी म्हटले आहे.
जळगाव जिल्हाधिकाऱ्यांचे आवाहन -
जळगाव जिल्ह्यात आढळलेले 'डेल्टा प्लस' व्हेरियंटचे सातही रुग्ण एकाच क्षेत्रातील आहेत. त्यांना मे महिन्यात कोरोनाची लागण झालेली होती. परंतु, कोणत्याही स्वरुपाची लक्षणे नव्हती. ते रुग्ण गृहविलगीकरणातच बरे झाले. त्यामुळे कोरोना विषाणूचा नवा व्हेरियंट आला म्हणून घाबरून जाऊ नये. एकमेकांपासून सुरक्षित अंतर, मास्कचा वापर आणि सॅनिटायझेशन ही त्रिसूत्री पाळावी, असे आवाहन जिल्हाधिकारी अभिजित राऊत यांनी केले आहे.
