मुंबई - भारतीय जनता पक्षाचे दिग्गज नेते गेल्या काही दिवसांपासून आपल्या वक्तव्यांमुळे वादग्रस्त ठरत आहेत. भाजपाचे नेते आणि मंत्री चंद्रकांत पाटील यांनी ज्योतिबा फुले यांच्याविषयी काढलेले उद्गार असतील, मंगल प्रभात लोढा यांनी शिवरायांची आणि मुख्यमंत्र्यांची केलेली तुलना असेल तर राज्यपाल भगतसिंह कोश्यारी मात्र सातत्याने आपल्या वक्तव्यामुळे टीकेचे धनी होत आहेत. राज्यपालांनी सावित्रीबाई फुले, दादोजी कोंडदेव, छत्रपती शिवाजी महाराज यांच्याविषयी सातत्याने अवमानकारक वक्तव्य केल्यामुळे विरोधी पक्ष आक्रमक झाला आहे. राज्यातील सर्वसामान्य जनता ही राज्यपालांना ट्रोल करू लागली आहे.
पहिलेच वादग्रस्त राज्यपाल - वास्तविक राज्यपाल हे अतिशय मोठे आणि घटनात्मक पद आहे. या पदावरील व्यक्ती सहसा सार्वजनिक कार्यक्रमांमध्ये भाग घेताना अत्यंत सावधगिरी बाळगत असते. कोणतेही सार्वजनिक वक्तव्य राज्यपाल पदावरील व्यक्ती आजपर्यंत टाळताना दिसत होती. मात्र, या घटनात्मक पदावर असतानाही भाजपाचे राज्यपाल भगतसिंह कुशारी यांनी सर्व सार्वजनिक कार्यक्रमांना हजेरी लावताना अतिशय वादग्रस्त वक्तव्य केली आहेत असा ताजा इतिहास आहे. विशेषता महाराष्ट्रातील महापुरुषांबाबत वक्तव्य करून जनतेच्या भावनाही त्यांनी सातत्याने दुखावल्या आहेत. राज्यपालांच्या समर्थनासाठी भारतीय जनता पक्षाच्या नेत्यांनाही पुढे येता येत नाही ही त्यांची अडचण झाली आहे. राज्यपाल सातत्याने पक्षाला अडचणीत आणत असल्याने यासंदर्भात भाजपच्या बड्या नेत्यांनीही केंद्राकडे आपल्या भावना व्यक्त केल्या आहेत.
राज्यपालांचीही केंद्राकडे पत्राद्वारे रदबदली - राज्यपाल भगतसिंह कोश्यारी यांनीही केंद्रीय गृहमंत्री आणि पंतप्रधानांना पत्र पाठवून आपण केलेल्या वक्तव्यामध्ये महापुरुषांना दुखावण्याची आपली भावना नव्हती, आपण ती वक्तव्य सहज केल्याचे म्हटले आहे. मात्र, राज्यपालांच्या केवळ माफीनाम्याने राज्यातील विरोधी पक्षाचे समाधान झालेले नाही. विरोधी पक्षाच्या हातात आयते कोलीत सापडल्याने त्यांनी राज्यपालविरोधात मोर्चाचे आयोजन केले आहे. त्यामध्ये मुख्य हेतू हा राज्यपालांना हटवण्याचा आहे.
राज्यपालांना पदावरून हटवल्याशिवाय माघार घेणार नाही - पुण्यात या संदर्भात आज बंद पुकारून जनतेने आपला रोष व्यक्त केला आहे. 17 डिसेंबरला महाविकास आघाडी ही राज्यपालांच्या विरोधात सर्वपक्षीय विराट मोर्चा काढण्याच्या तयारीत आहे. दरम्यान, या मोर्चाचे पडसाद आगामी अधिवेशनातही उमटण्याची शक्यता आहे. त्यामुळे राज्यपालांचा राजीनामा घेऊन किंवा त्यांना अन्यत्र पाठवून हा विषय संपला जाण्याची शक्यता अधिक आहे. या संदर्भात ईटीव्ही भारतने विधान परिषदेचे विरोधी पक्षनेते अंबादास दानवे यांच्याशी बातचीत केली असता, त्यांनी राज्यपाल भगतसिंह कोश्यारी यांनी केवळ माफी मागून हा प्रश्न सुटणार नाही, अशा विकृत राज्यपालांना पदावरून हटवल्याशिवाय आम्ही माघार घेणार नाही अशी ठाम भूमिका विरोधी पक्षाची असल्याची प्रतिक्रिया दिली आहे.
