मुंबई - राज्यातील धनगर समाजाला आरक्षण मिळेल यासाठीच आम्ही फडणवीस सरकारला साडेचार वर्षांपूर्वी राज्यात सत्तेत आणून बसवले होते. मात्र, या सरकारने धनगर समाजाची घोर फसवणूक केली आहे. यामुळे येत्या विधानसभेत आम्ही या सरकारला सत्तेतून खेचून खाली आणू, असा इशारा धनगर समाजाचे नेते व माजी आमदार प्रकाश शेंडगे यांनी आज ‘ईटीव्ही भारत’शी बोलताना दिला.
मराठा समाजाच्या आरक्षणाच्या संदर्भात न्यायालयाने दिलेल्या निकालानंतर त्यांनी ही प्रतिक्रिया दिली. मराठा समाजाला आरक्षण देण्यासाठी सरकारने वाट्टेल ते प्रयत्न केले. मात्र, धनगर समाजाच्या आरक्षणासाठी सरकारने समाजाची फसवणूक केली. आरक्षणासाठी काहीही ठोस पावले उचलली नाहीत. यामुळे धनगर समाजाची सरकारने घोर निराशा केली आहे आणि त्याची किंमत सरकारला मोजावी लागेल, असा इशारा त्यांनी दिला.
आम्ही सरकारला कधीही निधी मागितला नाही. आमची मुख्य मागणी आरक्षणाची होती, सरकारने निधी दिला. मात्र, याचा आम्हाला काहीही उपयोग होणार नाही. आरक्षणासाठी सरकारने केवळ टाटा सामाजिक संस्थेचा अहवाल आला असल्याचे सांगितले. तरीही तो अहवाल नेमका काय आहे, हे मात्र सांगितलेले नाही.
आज विधानपरिषदेत आमच्या आमदारांनी धनगर समाजाच्या आरक्षणावर प्रश्न उपस्थित केला. परंतु, सरकारची नाचक्की होईल म्हणून त्यावर सत्ताधारी पक्षाच्या सदस्यांनी चर्चा होऊ दिली नाही. यामुळे या सरकारची धनगर समाजाला आरक्षण देण्याची मानसिकता नाही, हे स्पष्ट झाले आहे. म्हणून या सरकारला येत्या निवडणुकीत सत्तेतून खेचून आणू असा इशाराही शेंडगे यांनी दिला.
