मुंबई - येथील आजाद मैदानावर 2 फेब्रुवारी रोजी शरजिल इमाम याच्या समर्थनात घोषणाबाजी करण्यात आली होती. या आरोपाखाली उर्वशी चुडावाला विरोधात देशद्रोहाचा गुन्हा दाखल करण्यात आला होता. चुडावाला हिला अटक केल्यास 25 हजार रुपयांच्या जात मुचलक्यावर पोलिसांनी तिची सुटका करावी, असे आदेश मुंबई उच्च न्यायालयाने दिले आहे.
यापूर्वी चुडावालाने सत्र न्यायालयात अटक पूर्व जामिनासाठी अर्ज दाखल केला होता. मात्र, तिची याचिका फेटाळण्यात आली होती. 12 फेब्रुवारी व 13 फेब्रुवारी रोजी सकाळी 11 ते 2 च्या दरम्यान आजाद मैदान पोलीस ठाण्यात हजेरी लावण्याचे आदेश उच्च न्यायालयाने दिले आहेत.
काय आहे प्रकरण
मुंबईच्या आझाद मैदानात 2 फेब्रुवारी रोजी एलजीबीटी समुदायातर्फे प्राईड मार्च काढण्यात आलेला होता. मात्र, या प्राईड मोर्चा दरम्यान देशद्रोहाचा गुन्हा दाखल होऊन अटक करण्यात आलेल्या शरजिल इमामच्या समर्थनार्थ काही जणांनी घोषणा दिल्या होत्या. यात मुंबई पोलिसांनी कारवाई करत उर्वशी चुडावालासह तब्बल 51 जणांवर देशद्रोहाचा गुन्हा दाखल केला होता.
हेही वाचा - उर्वशी चुडावालाचा अटकपूर्व जामीन न्यायालयाने फेटाळला, पोलिसांकडून शोध सुरू
