मुंबई : सोशल मीडिया सेन्सेशन उर्फी जावेद आणि भाजप नेत्या चित्रा वाघ यांच्यात मागील काही दिवसांपासून वाद सुरू आहे. उर्फी जावेदच्या तोकड्या कपड्यांवर भाजप महिला प्रदेशाध्यक्ष चित्रा वाघ यांनी आक्षेप घेतला होता. याप्रकरणी उर्फी जावेदविरुद्ध कारवाई करावी, अशी मागणी मुंबई पोलिसांकडे चित्रा वाघ यांनी केली होती. तसेच उर्फी समोर आली तर तिचे थोबाड रंगवणार, असे वक्तव्य चित्रा वाघ यांनी केले होते. यानंतर आता उर्फी जावेदने चित्रा वाघ यांच्याविरोधात मुंबई पोलिसांत तक्रार दाखल केली आहे. तसेच नुकतीच उर्फीने महाराष्ट्र राज्य महिला आयोगाच्या अध्यक्षा रुपाली चाकणकर यांची भेट घेतली होती. त्यानंतर उर्फीचे वकील नितीन सातपुते यांनी वाघ यांच्या विरोधात महिला आयोग आणि मुंबई पोलिसांकडे लेखी तक्रार दाखल केली आहे.
उर्फीवर कारवाईची मागणी : अभिनेत्री उर्फी जावेद हिच्या तोकड्या कपड्यांवर आक्षेप घेत उर्फीवर कारवाई करावी, अशी मागणी चित्रा वाघ यांनी मुंबई पोलिसांकडे केली होती. चित्रा वाघ यांनी म्हटले की, ज्या दिवशी उर्फी माझ्या हाताला सापडेल त्या दिवशी पहिल्यांदा तिचे थोबाड रंगवेन आणि नंतर मी ट्विट करून सांगेन की, मी काय केलंय ते. आजही सांगते, उर्फी जावेद समोर आली तर तिला आधी साडीचोळी देऊ; मात्र त्यानंतरही तिने तिचा नंगानाचा सुरूच ठेवला तर तिचे थेट थोबाड फोडणार आहे. उर्फीला कपड्यांची एलर्जी असेल तर आपण सगळ्या प्रकारच्या गोळ्या देण्यास सक्षम आहोत, असे वक्तव्य चित्रा वाघ यांनी केले होते. यानंतर आता उर्फी जावेदने चित्रा वाघ यांच्या विरोधात मुंबई पोलिसांत तक्रार दाखल केली आहे.
उर्फीच्या वकिलांचे स्पष्टीकरण : उर्फीचे वकील नितीन सातपुते यांनी याबाबत अधिक माहिती देताना सांगितले की, भाजपा नेत्या चित्रा वाघ यांच्या विरोधात धमकी दिल्या प्रकरणी भारतीय दंड संविधान कलम १५३ (ए) (बी) ५०४, ५०६ आणि ५०६(आयआय) अंतर्गत तक्रार दाखल केली आहे. अभिनेत्री व मॉडेल उर्फी जावेदला त्रास दिल्या प्रकरणी सीआर पीसी १४९ आणि १०७ अंतर्गत कारवाई करण्याची विनंती करण्यात आली आहे”.
चित्रा वाघ विरुद्ध उर्फी वाद शिगेला : चित्रा वाघ आणि उर्फी यांच्यातील हा वाद काही काळापासून सुरू आहे; मात्र आता त्याला वेगळेच वळण लागले आहे. चित्रा यांनी काही दिवसांपूर्वी उर्फीच्या कपड्यांवरून आक्षेप घेत ती नंगटपणा करत असल्याचे म्हटले होते. त्यावर उर्फीनेही सडेतोड उत्तर दिले होते; मात्र त्यानंतर वाघ यांनी पुन्हा उर्फीवर निशाणा साधला होता. त्यावर उर्फीने ट्वीट करत चित्रा यांना आपली सासू म्हटले होते. तिचे हे ट्वीट सोशल मीडियावर व्हायरल झाले होते. आता अखेर उर्फीने मोठे पाऊल उचलत चित्रा वाघ यांच्या विरोधात महिला आयोगाकडे तक्रार दाखल केली आहे. या तक्रारीत तिने वाघ यांच्याविरुद्ध धमकी देणे आणि चुकीची वागणूक देणे यासाठी तक्रार करत असल्याचा उल्लेख केला आहे.
