मुंबई - कोरोना संकटात वैद्यकीय विद्यार्थी सेवा बजावत आहेत. यामुळे मेडिकल कौन्सिल ऑफ इंडियाने, एमडी आणि एमएसच्या अंतिम वर्षाच्या परीक्षा डिसेंबरपर्यंत पुढे ढकलाव्यात, अशी मागणी मुख्यमंत्री उद्धव ठाकरे यांनी केली आहे. तसेच यासंदर्भात पंतप्रधान नरेंद्र मोदी यांनी स्वतः हस्तक्षेप करावा आणि मेडिकल कौन्सिल ऑफ इंडियाला तसे आदेश द्यावे, अशी विनंती त्यांनी पंतप्रधानांकडे पत्राद्वारे केली आहे.
एमसीआयने 18 जून रोजी पाठवलेल्या पत्रामध्ये अंतिम वर्षाच्या परीक्षा घेण्यात याव्यात, असे सांगितलेले आहे. यानुसार महाराष्ट्रात आरोग्य विज्ञान विद्यापीठाने 15 जुलैपर्यंत या परीक्षा घेण्यात याव्यात असे सांगितले आहे. पण सध्या राज्यातील सर्व शासकीय वैद्यकीय महाविद्यालयांमध्ये कोरोनाच्या रुग्णांवर मोठ्या प्रमाणात उपचार सुरू आहेत. याच दरम्यान जर हे प्रशिक्षित डॉक्टर परीक्षेसाठी गेले, तर राज्यात डॉक्टरांचा तुटवडा निर्माण होईल, अशी भीती व्यक्त होत आहे.
याविषयी मुख्यमंत्री उद्धव ठाकरे यांनी नरेंद्र मोदी यांना एक पत्र लिहिले. त्यात त्यांनी महाराष्ट्र सध्या कोरोनाशी लढतो आहे आणि या लढाईमध्ये मेडिकलच्या अंतिम वर्षाचे निवासी डॉक्टर कोव्हिड योद्धे म्हणून आपली कामगिरी बजावत आहेत. त्यामुळे अंतिम वर्षाच्या परीक्षा डिसेंबरमध्ये घ्याव्यात, अशी मागणी केली आहे.
हेही वाचा - नरिमन पॉईंट येथील बँक ऑफ बहरिन अँड कुवैतच्या 'सर्व्हर रुम'ला आग, आग नियंत्रणात
हेही वाचा - अकरावीची प्रवेश प्रक्रिया गुणवत्तेनुसारच राबवा अन्यथा न्यायालयात दाद मागू; सिस्कॉम संस्थेचा इशारा
