मुंबई - कुलाबा भागात थरकाप उडवणारी घटना समोर आली आहे. एका ३ वर्षाच्या चिमुकलीला तिच्या पित्याच्या मित्रानेच ७ व्या मजल्याच्या खिडकीतून खाली फेकले, यात तिचा मृत्यू झाला. याप्रकरणी पोलिसांनी अनिल चुगांनी या आरोपीला अटक केली आहे. त्याला आज न्यायालयात सादर केले जाणार आहे. काल (शनिवार) ही घटना घडली.
हेही वाचा - धक्कादायक! आईसह चिमुरड्याची बत्त्याने ठेचून हत्या
कुलाबा येथे राहणारे रमेशलाल रामनी यांना एक मुलगा आणि दोन जुळ्या मुली आहेत. शनिवारी त्यांचे मित्र आरोपी अनिल याने रमेशलाल यांना सहकुटुंब कुलाबा येथील घरी बोलवले होते. रामनी यांची तीन वर्षांची मुलगी शनया घरात दिसली नाही. तिचा शोध घेतला असता ती अनिल राहत असलेल्या इमारती खाली पडल्याचे दिसले. तिला उपचारासाठी दाखल केले असता डॉक्टरांनी उपचारापूर्वीच तिचा मृत्यू झाल्याचे घोषित केले.
हेही वाचा - घाटकोपरमध्ये घराचा काही भाग कोसळला; जीवितहानी नाही
या प्रकरणी कुलाबा पोलीस ठाण्यात गुन्हा नोंदविण्यात आला होता. पोलीस तपासात सुरुवातीला शनया हिला अनिल यांच्या घरात काम करणाऱ्या मोलकरणीने बेडरूमच्या खिडकीतून फेकून दिल्याचा संशय आला होता. परंतु, अनिल यास पोलिसी खाक्या दाखवताच त्याने गुन्हा कबूल केला आहे. अनिलला आज न्यायालयात हजर केले जाणार असून हत्येचे कारण शोधण्यासाठी कुलाबा पोलीस तपास करत आहेत.
