मुंबई - देशाला स्वातंत्र्य मिळवून देण्यासाठी महात्मा गांधी यांनी मुंबईतून इंग्रजांना चले जाव चा नारा देत देशात चळवळ उभी केली होती, त्याच मुंबईतून आता NRC आणि CAA विरोधात भारत जोडो ची चळवळ सुरू करा असे, आवाहन राष्ट्र सेवा दलाचे राष्ट्रीय अध्यक्ष डॉ. गणेश देवी यांनी शुक्रवारी मुंबईत केले. NRC आणि CAA विरोधात आग्रिपाडा येथील वायएमसीए मैदानात आयोजित कार्यक्रमात ते बोलत होते.
हेही वाचा - ''भारतात बाहेरचे किती मुस्लीम आहेत, याची आकडेवारी 'त्यांनी' द्यावी''
डॉ. देवी म्हणाले की, महात्मा गांधी यांच्या चले जाव आंदोलनाची ज्या प्रकारे मुंबईत सुरुवात झाली होती. त्याचप्रमाणे आता NRC आणि CAA विरोधात देशात भारत जोडो आंदोलन केले पाहिजे. यासाठी मुंबईकरांनी पुढाकार घ्यावा. मोदी सरकार सर्वात जास्त भित्रे आहे. त्यामुळे त्यांना आता घाबरायची गरज नाही. त्यांच्याकडून NRC आणि CAA कायदे आणले तरी त्याला असहकार करा. त्यासाठी आपल्या प्रत्येकाच्या घरात संविधान ठेवा आणि आपल्या घराच्या दरवाज्यावर लिहून त्याचे स्टिकर चिकटवा "आम्ही NRC आणि CAA यासाठी सहकार्य करणार नाही. आम्ही माहिती देणार आणि कागदपत्रे दाखवणार नाही" अशी सर्वांनी भूमिका घ्या. सर्वात मोठा अधिकाराचा कागद असलेल्या भारतीय संविधानाची प्रत आपल्या घरात ठेवा, असे आवाहन डॉ. देवी यांनी केले.
हेही वाचा - 'मुंबई जिल्ह्यातील सर्व हेरीटेज इमारतींना संवर्धित करण्यासाठी अर्थसंकल्पात वेगळा विचार केला जाईल'
यावेळी केंद्र सरकारच्या NRC आणि CAA कायद्याला विरोध करण्यासाठी महिला, पुरुषांसोबत विद्यार्थी प्रचंड मोठ्या संख्येने उपस्थित होते. त्यावेळी डॉ. देवी यांनी मुंबईकरांना हे आवाहन केले. यावेळी विद्यार्थी आणि सीपीआय नेते डॉ. कन्हैया कुमार, उत्तर प्रदेशातील युवा नेत्या रिचा सिंग, छात्र भारतीच्या सादिया शेख, जामिया विद्यापीठातील विद्यार्थी नेत्या चंदा यादव, मिरान हैदर, युवा छात्र संघटनेचे सरचिटणीस मुल तालुकदार हे विद्यार्थी नेते उपस्थित होते.
