मुंबई - लोकसभा निवडणुकीमध्ये ईव्हीएम मशीनमधील गडबडीमुळे देशभरात भाजपला यश मिळाल्याचा दावा केला जात आहे. त्यातच राष्ट्रवादी काँग्रेस अध्यक्ष शरद पवार यांनीही ईव्हीएम-व्हीव्हीपॅट मशीनमध्ये मतमोजणी करताना संबंधित अधिकाऱ्यांसमोरच गडबड झाल्याचा गौप्यस्फोट आज मुंबईत केला. याविषयी अनेक तज्ञांनी माहिती दिली असून त्यामधील वस्तुस्थिती जाणून घेण्यासाठी आम्ही देशभरातील मित्रपक्ष आणि इतर तज्ञांशी बोलून येत्या काळात निर्णय घेणार असल्याचेही पवार यांनी सांगितले.
राष्ट्रवादी काँग्रेसच्या 20 व्या वर्धापनदिना निमित्त आज पक्षाकडून मुंबईत राष्ट्रवादी काँग्रेसच्या मुख्य कार्यालयापासून जलदिंडी काढण्यात आली, तिचा समारोप यशवंतराव चव्हाण प्रतिष्ठान येथे झाला, त्यावेळी झालेल्या समारोपाच्या कार्यक्रमात पवार बोलत होते.
यावेळी पवार म्हणाले की, ईव्हीएम, व्हीव्हीपॅट मशिनमध्ये गडबड नव्हती. तर मतमोजणी अधिकाऱ्यासमोर एक मशिन होते. त्या मशिनमध्ये खरी गडबड झाली आहे. या मशीन देशात दोनच कंपन्या बनवतात. त्यामध्ये एक केंद्र सरकारच्या आटोमिक एनर्जीची आणि केंद्राची एक कंपनी याची निर्मिती करते. याच कंपन्या या मशिनमध्ये सेटिंग करतात. ही सेटिंग करायला 8 ते 10 लोक लागतात, त्यापेक्षा अधिक लागत नाहीत. हे लोक संबंध देशाचे काम काही तासात करू शकतात, त्यामुळे यामधील आम्ही वस्तुस्थिती जाणून घेण्याचे काम करणार असल्याचे पवार यांनी सांगितले.
देशाचे नेतृत्व कारणाऱ्या घटकांना सर्वांना समोर घेऊन जाण्याच्या संकल्पनेला तिलांजली द्यायची आहे. म्हणूनच बाँम्ब स्फोटसारखे आरोप असलेले लोक आता संसदेत आणले आहेत. जगात आधुनिकतेला स्थान दिले जात असताना पंतप्रधान भगवे वस्त्र घालून गुहेत बसतात. लोकांच्या मनात जाणीवपूर्वक राष्ट्रवादाचा मुद्दा आणून देशात धार्मिक ध्रुवीकरण केले जात आहे. तर पाकिस्तानला घरात घुसून मारू, असे म्हणणारे निवडणूकीनंतर कसे शांत झाले हे आता देशातील लोक पाहत आहेत, असेही पवार यावेळी म्हणाले.
भाजपने निवडणुका जिंकण्यासाठी देशातील जनतेचे ध्रुवीकरण केले हे आता स्पष्ट झाले आहे. त्यामुळे विधानसभा निवडणुकसाठी रणनीती बदलावी लागेल, असे म्हणाले आहेत.
राष्ट्रवादीचा चेहरा सध्या ग्रामीण आहे, यानंतर तो शहरीही झाला पाहिजे. राज्यात 50 टक्के लोक नागरी भागात असतात, प्रत्येक तालुक्यात नागरीकरण झाले आहे, त्यांच्याकडे दुर्लक्ष करून आपण यशस्वी होणार नाही. नागरी भागात पक्षाची व्याप्ती वाढविण्यासाठी भर देण्याची गरज असल्याचे पवार यांनी यावेळी स्पष्ट केले. आज नागपूर, चंद्रपुरात 50 टक्के लोक हिंदी बोलतात. त्या लोकांना सोबत घेणे आवश्यक आहे. यासाठीच मुंबईत आपल्या कामाचा विस्तार वाढवायचा आहे. त्यामुळे मुंबईत सगळ्या घटकांना सोबत घेऊन जायचे असल्याचे त्यांनी सांगितले. त्यामुळे सर्व स्थिती पाहून जागांबाबत निर्णय घेण्याच्या सूचना त्यांनी नेत्यांना दिल्या.
तर महापालिका निवडणुकीत अधिक लोकांना संधी दिली तर ती प्रभावीपणे दिली गेली पाहिजे, असे पवारांनी सांगितले. त्याबरोबरच त्यांनी नेत्यांना महापालिकेवर लक्ष ठेवण्यासाठी सांगितले आहे. 20 वर्षांपूर्वी आपले लोक निवडून आले त्यावेळी हा पक्ष तरुणांचा पक्ष होता. त्यामुळे आज सगळ्या सत्तेच्या जागांवर नवी पिढी किती आहे, याची काळजी घेऊन तरुणांना अधिक संधी देण्याची गरज असल्याचे पवारांनी सांगितले.
