पुणे : विधानसभा निवडणुकीच्या निकालाकडं (Maharashtra Assembly Election Result 2024) संपूर्ण महाराष्ट्राचं लक्ष आहे. महायुती की महाविकास आघाडी, महाराष्ट्रात कोण सरकार स्थापन करणार? हे पाहणं महत्त्वाचं ठरणार आहे. त्यातच आता बारामती विधानसभा मतदारसंघात अजित पवार यांनी मोठी आघाडी घेतली आहे. आठव्या फेरीअखेर अजित पवारांनी 73,025 मतं मिळवली आहेत. त्यांच्याकडं 38 हजारांची आघाडी आहे. त्यामुळं अजित पवार हे सध्या विजयाच्या उंबरठ्यावर असून त्यांच्या कार्यकर्त्यांनी आत्तापासूनच जल्लोष करण्यास सुरुवात केली आहे.
शरद पवार यांचं आवाहन : या निवडणुकीत सर्वात जास्त चर्चेत राहिलेला मतदारसंघ म्हणजे 'बारामती'. बारामतीत अजित पवार विरुद्ध युगेंद्र पवार अशी लढत होत आहे. युगेंद्र पवार हे अजित पवारांचे पुतणे आहेत. त्यामुळं ही काका विरुद्ध पुतण्याची लढत महत्त्वाची मानली जात आहे. युगेंद्र पवारांना निवडून द्या, असं भावनिक आवाहन राष्ट्रवादी कॉंग्रेसचे (शरदचंद्र पवार) अध्यक्ष शरद पवार यांनी केलं होतं. बारामतीकरांनी शरद पवारांच्या या आवाहनाला प्रतिसाद दिला की त्यांनी अजित पवारांना प्रतिसाद दिला, हे पाहणं महत्त्वाचं ठरणार आहे.
निवडणुकीच्या पार्श्वभूमीवर अजित पवार यांनी आपला मतदारसंघ पिंजून काढला. प्रत्येक गावामध्ये भेटी देण्याचा, सभा घेण्याचा आणि आपली विकास कामं, योजना तळागाळापर्यंत पोहोचवत अजित पवारांनी मतदारांना साथ देण्याचं आवाहन केलं होतं. त्याचबरोबर आत्तापर्यंत केलेल्या कामांची उजळणी देखील त्यांनी यावेळी केल्याचं दिसून आलं. तसंच "लोकसभेला साहेबांना साथ दिली तशी साथ आता विधानसभेला मला द्या", असं देखील अजित पवार यांनी म्हटलं होतं. त्यावरुन बारामतीकरांनी कोणाच्या पारड्यात विजय टाकला यांची उत्सुकता सर्वांना लागली होती.
2019 च्या निवडणुकीत काय घडलं? : 2019 मध्ये बारामती विधानसभेत अजित पवार यांनी भाजपाचे उमेदवार गोपीचंद पडळकर यांचा दारुण पराभव केला होता. अजित पवार हे 1991 पासून बारामती विधानसभा मतदारसंघाचं प्रतिनिधित्व करत आहेत. अजित पवार सर्वाधिकवेळा राज्याचे उपमुख्यमंत्री राहिले असून सध्या ते पाचव्यांदा या पदावर आहेत.
हेही वाचा -
