मुंबई - लोकसभेचे मतदान संपल्यानंतर मी लगेचच दुष्काळी दौऱयावर गेलो. त्यामुळे सरकारला दुष्काळाची आठवण झाली, अशी टीका राष्ट्रवादीचे अध्यक्ष शरद पवार यांनी केली. यशवंराव चव्हाण केंद्रामध्ये राष्ट्रवादी काँग्रेसने पक्षांतर्गत दुष्काळी आढावा बैठकीचे आयोजन केले होते. या बैठीकीनंतर पवार यांनी पत्रकारांशी संवाद साधला. यावेळी ते बोलत होते.
सरकारला दुष्काळी स्तिथीचे गांभीर्य नाही. राज्यात यंदा परतीचा पाऊस चांगला झाला नाही. त्यामुळे दुष्काळाची भीषण स्थिती आहे. विदर्भातील काही जिल्हे मराठवाडा आणि पश्चिम महाराष्ट्रात दुष्काळाची तीव्रता अधिक आहे. दुष्काळी दौऱ्यासाठी मी सोलापूरला पोहचलो. त्यामुळे राज्य सरकराने याची दाखल घेतली. सरकार जागे झाले आणि त्यांनी बैठका घ्यायला सुरुवात केली. मी जर दौरा केला नसता तर तेही झाले नसते, असेही पवार म्हणाले.
ते पुढे म्हणाले, विदर्भातील बुलढाणा, अकोला, अमरावती या भागात तसेच मराठवाड्यातील बहुतांश भाग आणि पश्चिम महाराष्ट्रातल्या भागात दुष्काळाची गंभीर अवस्था आहे. एक पीक जाणे आणि फळबाग जाणे या नुकसानीत जमीन-आसमानचा फरक आहे. एक फळबाग उभी करण्यासाठी चार-पाच वर्षांचा कालावधी लागतो. या दुष्काळात फळबागांचे मोठे नुकसान झाले आहे. राष्ट्रवादीचे प्रदेशाध्यक्ष जयंत पाटील शिष्य मंडळासह मुख्यमंत्र्यांना भेटून दुष्काळ निवारण आणि मदतीसंदर्भात मागण्या करतील.
सध्या चारा छावण्यात प्रत्येक शेतकऱ्यांची पाच जनावरे घेतात. हे बरोबर नाही. सरसकट जनावरे घेतली पाहिजेत. ज्या शेतकऱ्यांकडे लहान मोठी पाचपेक्षा अधिक जनावरे आहेत त्यांनी काय करायचे ? असा सवालही त्यांनी उपस्थित केला. चाऱ्यासाठी मोठ्या जनावरांना प्रतिदिन ९० रुपये दिले जातात. ही तुटपुंजी रक्कम आहे. त्यासाठी रक्कम वाढवली पाहिजे. हिरव्या चाऱ्यासह जनावरांना पेंडही मिळावी. त्यासाठी रक्कम वाढवून देणे आवश्यक आहे. जनतेला आणि जनावरांनाही पाणी मिळावे अशी तरतूद केली पाहिजे, असेही पवार यांनी यावेळी सांगितले .
शरद पवार यांनी केलेल्या मागण्या
१. सरकारने कर्ज फेडणाऱ्या शेतकऱ्यांची कर्जमाफी तसेच कर्जाचे पुनर्गठन करण्याचा मुद्दा यावर तातडीने निर्णय घ्यावा.
२. पुढील काळात कर्जाचे पुनर्गठन करणे आणि पाऊस सुरु झाल्यानंतर शेतकर्‍याला बी-बियाणे, खते विकत घेण्यासाठी पुन्हा कर्ज स्वरुपात मदत दिली गेली पाहिजे.
३. जून महिन्यात शाळा, महाविद्यालये सुरू होतील. त्यामुळे शेतकऱ्यांच्या मुलांना प्रवेश फी सरकारने द्यावी.
४. सहकारी संस्था, सीएसआर यातूनही शेतकर्‍यांना मदत दिली जावी.
५. पाणी फाऊंडेशनसारख्या संस्था महाराष्ट्रात जलसंवर्धनाचे काम करत आहेत. त्यांना मोठ्या प्रमाणात पाठिंबा द्यावा. यात राष्ट्रवादीचे कार्यकर्तेही सहभागी होतील.
राज्यकर्त्यांनी दुष्काळाची गांभीर्याने दाखल घेतलीच नाही. पंतप्रधान मोदी यांनाही सरकारची नीती, उपाययोजना याबाबत बोलण्याची संधी प्रचारात होती. पण त्यांनीही दुष्काळ गांभीर्याने घेतला नाही, अशी टीकाही पवार यांनी केली. आचारसंहितेच्या काळात दुष्काळ निवारण कामासाठी निवडणूक आयोग काही आडकाठी करेल, असे काही मला वाटत नसल्याचे त्यांनी यावेळी स्पष्ट केले. मुख्यमंत्री म्हणत होते, जलयुक्त शिवारने क्रांती झाली. मग ही क्रांती आता कुठे गेली ? असा सवाल करत माझे राजकीय जीवनच जलसंधारणांच्या कामाने झाले आहे. आम्हालाही थोडा महाराष्ट्र कळतो, अशी कोपरखळीही पवार यांनी मुख्यमंत्र्यांना मारली.
दरम्यान, यावेळी बोलताना राष्ट्रवादीचे नेते छगन भुजबळ म्हणाले, नाशिकमध्ये पाण्याची भीषण टंचाई आहे. या स्थितीत तेथे २०११ च्या लोकसंख्येनुसार पाणी दिले जाते. त्यामुळे नागरिक हैराण झाले आहेत. तर सिन्नरमध्ये २२ जनावरे पाण्याअभावी दगावली आहेत, अशी माहितीही यावेळी भुजबळ यांनी यावेळी दिली.
