मुंबई - राष्ट्रवादीचे अध्यक्ष शरद पवार यांनी मोठी घोषणा केली आहे. त्यांनी राष्ट्रवादी कॉंग्रेसच्या अध्यक्षपदावरून निवृत्त होण्याचा निर्णय घेतला आहे. शरद पवार म्हणाले की, मी आता पुन्हा निवडणुकीला उभा राहणार नाही. कुठेतरी थांबायचा विचार केला पाहिजे. त्यांच्या या घोषणेनंतर शरद पवार व त्यांच्या पत्नी प्रतिभा पवार यांना अश्रू अनावर झाले.
निवृत्तीची घोषणा करताना शरद पवार काय म्हणाले? - 1 मे 1960 ते 1 मे 2023 इतक्या प्रदीर्घ कालावधीनंतर कुठेतरी थांबायचा विचारसुद्धा केला पाहिजे. माणसाला अधिक मोह असू नये, आणि इतकी वर्ष संधी मिळाल्यानंतर आणखी मोह ठेवण्यासंबंधीची भूमिका मी काही कधी घेणार नाही. त्यामुळे तुम्हाला अस्वस्थता कदाचित वाटेल, पण मी राष्ट्रवादी काँग्रेस पक्षाच्या अध्यक्षपदावरुन निवृत्त व्हायचा निर्णय आज घेतलेला आहे, असे शरद पवार निवृत्तीची घोषणा करताना म्हणाले.
कार्यकर्ते रडले - राष्ट्रवादीचे अध्यक्ष कोण होणार हे ठरविण्यासाठी समितीची स्थापना करावी, अशी सूचना शरद पवार यांनी केली आहे. ही समिती राजकीय वारसदार ठरवेल, असे पवार यांनी म्हटले आहे. निवृत्ती जाहीर केली असली तरी सहकार, सांस्कृतिक व क्रीडा यामध्ये अधिक काम करणार आहे. समाजातील कमकुवत घटक, युवक-युवती व विद्यार्थ्यांना प्रोत्साहित करणार असल्याचे जाहीर केले आहे. शरद पवारांच्या निर्णयानंतर अनेक कार्यकर्त्यांना रडू कोसळले आहेत.
तुम्हीच आमचे कमिटी- जयंत पाटील यांना बोलताना रडू कोसळले. त्यांनी हुंदका आवरत देशाला तुमच्या अनुभवाची गरज असल्याचे सांगितले. पक्षात जे काही बदल कराल, ते मंजूर असल्याचेही सांगितले. छगन भुजबळ यांनीदेखील निवृत्तीचा निर्णय मागे घेण्याची मागणी केली आहे. कमिटी नियुक्तीचा निर्णयदेखील नामंजूर असल्याचे सांगितले. तसेच तुम्हीच आमचे कमिटी आणि सर्व काही असल्याचे सांगितले. पक्ष कार्यकर्त्यांनीही कमिटी नामंजूर असल्याचे हात वर करून सांगितले आहे.
सभागृहात एकच गोंधळ- कार्यकर्त्यांनी शरद पवारांच्या निवृत्तीच्या निर्णयाला विरोध केला आहे. शरद पवार बुलंद आवाज, अशी घोषणाबाजी कार्यकर्त्यांनी केली आहे. अनेक कार्यकर्ते व्यासपीठावर आले आहेत. त्यामुळे एकच गोंधळ झाला आहे. कार्यकर्त्यांना आवरणे कठीण झाल्याने अजित पवार यांनी परिस्थिती सावरण्याचा प्रयत्न केला आहे. पोलिसांनी बाजूला व्हावे, आम्ही आमचे पाहू, अशी घोषणा अजित पवारांनी केली आहे. सभागृहात कार्यकर्त्यांना आवरणे कठीण झाले असल्याने थोड्याच वेळात स्वत: शरद पवार हे माध्यमांशी संवाद करतील, अशी शक्यता आहे.
संजय राऊतांची प्रतिक्रिया - एक वेळ अशी आली..घाणेरडे आरोप..प्रत्यारोप..राजकारण याचा उबग येऊन शिवसेना प्रमुख बाळासाहेब ठाकरे यांनी देखील शिवसेना प्रमुख पदाचा राजीनामा दिला होता. शरद पवार यांनी तेच केले आहे. जनतेच्या रेट्यामुळे बाळासाहेबांना राजीनामा मागे घ्यावा लागला. शरद पवार हे देशाच्या राजकारणाचे आणि समाजकारणाचे श्वास आहेत, अशी प्रतिक्रिया संजय राऊत यांनी ट्विटद्वारे दिली आहे.
शरद पवारांची राजकीय कारकीर्द : शरद पवार यांनी 4 वेळा महाराष्ट्राचे मुख्यमंत्री म्हणून काम केले आहे. त्यांनी केंद्रात पीव्ही नरसिंह राव यांच्या मंत्रिमंडळात संरक्षण मंत्री आणि मनमोहन सिंग यांच्या मंत्रिमंडळात कृषी मंत्री म्हणून काम केले आहे. सोनिया गांधी यांच्या विदेशी नागरिकत्वाच्या मुद्यावरून ते काँग्रेसपासून वेगळे झाले आणि 1999 मध्ये त्यांनी राष्ट्रवादी काँग्रेस पक्षाची स्थापना केली. तेव्हापासून ते आजतागायत राष्ट्रवादीचे अध्यक्ष होते. ते सध्या शिवसेना, राष्ट्रवादी आणि कॉंग्रेस या तीन पक्षांच्या महाविकास आघाडी या राजकीय आघाडीचे अध्यक्ष आहेत.
हेही वाचा - Sharad Pawars retirement announcement : शरद पवारांच्या निवृत्तीबाबत एकट्या अजित पवारांचा सूर वेगळा
