मुंबई - अशासकीय खासगी शाळांमधील अर्धवेळ शिक्षक, शिक्षकेतर कर्मचारी, ग्रंथपाल आणि रात्र शाळा शिक्षक यांना सातवा वेतन आयोग लागू करण्यात आला आहे, अशी माहिती शालेय शिक्षण क्रीडा व युवक कल्याण मंत्री अॅड. आशिष शेलार यांनी दिली. याबाबतचा शासन निर्णयही जारी करण्यात आला आहे.
शिक्षण विभागाच्या या निर्णयाचे शिक्षक आमदार नागो गाणार, माजी शिक्षक आमदार रामनाथ मोते, शिक्षक परिषदेचे शिवनाथ दराडे, आमदार कपिल पाटील आणि इतर अनेक शिक्षक संघटनांनी स्वागत केले आहे.
राज्यातील अशासकीय खासगी शाळातील पूर्णवेळ कर्मचाऱ्यांना दिनांक 22 फेब्रुवारी 2019 रोजीच्या शासन निर्णयानुसार दिनांक 1 जानेवारी 2016 पासून सातवा वेतन आयोग लागू करण्यात आला होता. तसेच अनुदानित व महापालिका, नगरपालिका शाळांमधील शिक्षकांनाही सातवा वेतन आयोग लागू करण्याचा निर्णयही घेण्यात आला आहे. मात्र, अशासकीय खाजगी शाळेतील अर्धवेळ शिक्षक, शिक्षकेतर कर्मचारी ग्रंथपाल व रात्र शाळेचे शिक्षकांचा निर्णय प्रलंबित होता.
राज्यात 1012 अर्धवेळ शिक्षक, 1431 अर्धवेळ ग्रंथपाल तसेच 165 रात्र शाळांमधे काम करणारे 630 रात्र शाळा शिक्षक, 219 शिक्षकेत्तर कर्मचारी असून या सर्वांना 1 जानेवारी 2016 पासून सातवा वेतन आयोग लागू करणारा निर्णय आशिष शेलार यांनी घेतला असून त्याचा निर्णय आज जारी करण्यात आला.
