मुंबई : गेल्या तीन महिन्यांपासून मणिपूर राज्यात हिंसा भडकलेली आहे. तिथे आमदार, त्या राज्याचे मंत्री सोबतच केंद्राचे विदेश राज्य मंत्री सिंग यांचेही घर जाळण्यात आले. या हिंसाचारामुळे या भागातून हजारो लोक निर्वासित झाले, हजारो लोकांनी या भागातून पलायन केले. हे गृहमंत्रालयाचे अपयश असल्याचा हल्लाबोल उद्धव ठाकरे गटाचे नेते संजय राऊत यांनी केला. सीमेपलिकडून त्यांना शस्त्र पुरवण्यात येत आहेत, त्यामुळे तुमची चीनसोबत लढण्याची ताकद नाही, त्यामुळे तुम्ही मणिपूरमध्ये हस्तक्षेप करत नसल्याचा आरोपही संजय राऊत यांनी केला.
उग्रवाद्यांच्या गोळीबारात ९ जण ठार : मणिपूरमध्ये हिंसाचार सुरू असून मंगळवारी उग्रवाद्यांनी केलेल्या गोळीबारात ९ जण ठार झाले तर १० जण जखमी झाले. यादरम्यान खमेनलोक गावातील अनेक घरांनाही उग्रवाद्यांनी आग लावली. तामेंगलाँग जिल्ह्यातील गोबाजंग येथेही अनेक जण जखमी झाल्याची माहिती आहे. तर, दुसरीकडे मुख्यमंत्र्यांच्या ठाण्यात शिवसेना ठाकरे गटाच्या नेत्या अयोध्या पोळ या एका कार्यक्रमाला गेल्या असता त्यांच्या तोंडाला काळे फासण्यात आले आहे. सोबतच शिवसेनेचा वर्धापनदिन 19 तारखेला आहे. याची तयारी शिंदे गटानेही केली आहे. या सर्व मुद्द्यांवर ठाकरे गटाचे खासदार संजय राऊत यांनी मुंबईत आपली प्रतिक्रिया दिली आहे.
पंतप्रधान नरेंद्र मोदी यांची अमेरिकेत जायची तयारी : इकडे आपले मणिपूर जळत असताना पंतप्रधान नरेंद्र मोदी यांची अमेरिकेत जायची आणि शक्ती प्रदर्शन करण्याची जोरात तयारी सुरू असल्याचेही ते म्हणाले. मणिपूर हिंसाचारात शेकडो लोक मारले जात आहेत. या भागात शंभरच्यावर उग्रवादी घुसले आहेत. त्याच्यावर एक शब्दही गृहमंत्री बोलायला तयार नाहीत. या राज्यात हिंदू मुसलमान झगडा करता येत नाही. कश्मीर प्रमाणे समाजात तेढ निर्माण करता येत नाही. म्हणून मणिपूरवर ते आता गप्प आहेत. काल 100 च्यावर उग्रवादी या भागात घुसले आहेत. इतकाच नाही तर त्यांना काही सीमेपलीकडून अत्याधुनिक शस्त्र पोचविण्यात आलेली आहेत. तुमची चीनशी लढण्याची ताकद नाही. म्हणून तुम्ही मणिपूरमध्ये हस्तक्षेप करत नाही. मणिपूरमधून घुसलेल्यांना चीनची मदत मिळत आहे. जसा पाकिस्तानात सर्जिकल स्ट्राइक केला तसा चीनमध्ये सर्जिकल स्ट्राइक करण्याची हिम्मत आहे का?" असा थेट सवाल खासदार राऊत यांनी केला आहे.
याला डरपोकपणा म्हणतात : राज्याचा संभाव्य मंत्रिमंडळ विस्तार देखील लवकरच होईल अशा चर्चा आहेत. यावर खासदार संजय राऊत यांना विचारलं असता ते म्हणाले की, "माझ्या त्यांना शुभेच्छा आहेत. जर हा मंत्रिमंडळ विस्तार झाला तर त्यांना माझ्या शुभेच्छा आहेत." मुख्यमंत्र्यांच्या ठाण्यात शिवसेना ठाकरे गटाच्या नेत्या अयोध्या पोळ या एका कार्यक्रमाला गेल्या असता त्यांच्या तोंडाला काळं फासण्यात आले. यावर बोलताना राऊत म्हणाले की, "मुख्यमंत्र्यांच्या ठाण्यात ज्या पद्धतीने महिलेवर हल्ला झाला पोलीस काय करत आहेत? माझा आयुक्तांना प्रश्न आहे हेच काय तुमच्या ठाण्यातील महिलांची सुरक्षा? तिला फसवून एका कार्यक्रमात बोलावले आणि तिच्यावर हल्ला झाला. याला डरपोकपणा म्हणतात समोरासमोर या."
जत्रा उठली की तंबू उठतील : शिवसेनेचा वर्धापनदिन 19 तारखेला आहे. याची तयारी शिंदे गटानेही केली आहे. शिंदे गटाने वर्धापन दिनाच्या एक टिझर देखील प्रसिद्ध केला आहे. त्यावर बोलताना खासदार राऊत म्हणाले की, "शिवसेनेचा वर्धापन दिन 19 तारखेला आहे. उद्धव ठाकरे हे शिवसेना पक्ष प्रमुख आहेत. गावच्या जत्रेत तंबू असतात त्यात खोटे चंद्र असतात, मर्सिडीज गाडी असते त्यात ती लोक बसून फोटो काढत असतात तशी हे लोक शिवसेना हे नाव आपल्या पाठीशी लावून फोटो काढत आहेत. यांची जत्रेतली खोटी शिवसेना आहे. आमचा वर्धापन दिन हा 19 जूनला षण्मुखानंद हॉलमध्ये वाजत गाजत होणार आहे. उद्या आमचs शिबिर आहे वरळीला ते देखील जोरदार होईल. जत्रा उठायची वेळ झालेली आहे. जत्रा उठली की हे या लोकांचे तंबू देखील उठतील.
हेही वाचा -
