मुंबई - कोरोनाच्या पार्श्वभूमीवर लावण्यात आलेला लॉकडाऊन आता ३१ मे पर्यंत वाढवण्यात आला आहे. देशव्यापी लॉकडाऊनचा हा चौथा ट्प्पा आहे. मात्र, त्याची अंमलबजावणी कितपत होते यात शंकाच आहे. कारण दुसऱ्या आणि तिसऱ्या ट्प्प्यातच अनेक नागरिक आणि मजूर आपल्या घरी निघाले आहेत. भाजप सरकारने या मजुरांची मदत करायचे सोडून त्यांची सत्ता असलेल्या काही राज्यांनी या मजूरांचा स्वीकार करण्यासही नकार दिला आहे. याउलट विरोधी पक्षातील नेते मजूरांची मदत करत आहेत, तर भाजप मंत्र्यांना मिरच्या झोंबत आहेत. भाजपच्या या धोरणावर सामनात जोरदार टीका करण्यात आली.
सध्याचे चित्र भयावह आहे. एकीकडे देशात कोरोना रुग्णांची संख्या झपाट्याने वाढत आहे तर दुसरीकडे मजूरांची ससेहोलपट सुरूच आहे. काँग्रेस नेते राहूल गांधींनी काही दिवसांपूर्वी दिल्लीच्या रस्त्यांवर चालणाऱ्या मजूरांसोबत संवाद साधला. त्यांची विचारपूस करून नंतर त्यांची घरी जाण्याची व्यवस्थाही केली. या प्रकरणाची पुरेशी माहिती न घेताच अर्थमंत्री निर्मला सीतारामन यांनी राहूल यांच्यावर टीका केली. भाजपचे मंत्री लॉकडाऊन कुरवाळत घरात बसले आहेत आणि दुसरे या मजूरांची मदत करत आहेत तर यांना तेही सहन होत नाही. आपल्याच मजूरांना राज्यात घेण्यास विरोध करणाऱ्यांनी माणुसकीच्या गप्पा करू नयेत असे, सामनातून सुचवण्यात आले आहे.
लोकांची घरात बसण्याची तयार आहे. मात्र, त्यांच्या पोटापाण्याची भूक कोण भागवणार? गेल्या दोन महिन्यापासून सर्व बंद आहे. अशा परिस्थितीत लोक तरी किती वेळ संयम ठेवणार. काही राज्य आपल्याच लोकांना स्वीकारायला तयार नाहीत. ही एक प्रकारची अस्पृश्यताच म्हणावी का? लोक अन्न-पाण्यासाठी पायपीट करत आहेत. भूकेने व्याकूळ झालेले लोक एकमेकांच्या हातातील अन्न खेचून घेण्यासाठी मारामाऱ्या करत आहेत. जबलपूर रेल्वे स्थानकावर अशीच घटना घडली. बंगळुरू- हाजीपूर जाणाऱया मजूरांच्या रेल्वेतील मजूरांनी स्थानकावरील अन्न पदार्थांची अक्षरश: लूट केली. हे असेच सुरू राहिले तर सोमालिया सारखी देशाची स्थिती होण्यास वेळ लागणार नाही.
अर्थमंत्री निर्मला सीतारामन दररोज पत्रकार परिषदा घेऊन पॅकेज देण्याच्या घोषणा करत आहेत. ज्या दिवशी हे पॅकेज लोकांपर्यंत पोहचेल तोच दिवस खरा. स्थलांतरित मजूरांच्या पायाच्या चिंध्या झाल्या आहेत. केंद्र सरकारला आणि त्यांच्या मंत्र्यांना याचे काही घेणे-देणे नाही. ते आपले बसले आहेत लॉकडाऊन कुरवाळत. कोरोनाने नवे कलियुग आणले असेच म्हणावे लागेल!
