मुंबई - पंजाब आणि महाराष्ट्र बँकेतील घोटाळ्यामुळे रिझर्व्ह बँक ऑफ इंडियाने घातलेल्या बंधनातून खातेदारांना लवकर दिलासा मिळावा, तसेच बँकेचे दैनंदिन व्यवहार सुरळीत सुरू व्हावेत, यासाठी आमदार रवींद्र वायकर यांनी मुंबई उच्च न्यायालयात रिट दाखल केली आहे. याप्रकरणी, न्यायालयाने मध्यस्थी करुन खातेदारांना दिलासा द्यावा, अशी विनंती त्यांनी रिट याचिकेद्वारे केली आहे.
पीएमसी बँकेतील घोटाळा उघडकीस आल्याने आरबीआयने संचालक मंडळ बरखास्त केले असून प्रशासकाची नियुक्ती केली आहे. एवढेच नव्हे तर खातेदारकांना स्वत:च्या खात्यातील पैसे काढण्यासाठीही काही बंधने घातली. त्यामुळे खातेदारांना अनेक अडचणींचा सामना करावा लागत असल्याने त्यांच्यामध्ये तीव्र नाराजी पसरली आहे. यातून खातेदारांना तत्काळ दिलासा मिळावा यासाठी जोगेश्‍वरीतील अनेक खातेदारांनी आमदार रविंद्र वायकर यांची भेट घेतली.
हेही वाचा - पीएमसी बँके प्रकरणी तणावाखाली असलेल्या बँक खातेदाराचा मृत्यू
खातेदारकांचे म्हणणे ऐकुन घेतल्यानंतर वायकर यांनी तत्काळ मुख्यमंत्री देवेंद्र फडणवीस यांची 1 ऑक्टोबरला त्यांच्या वर्षा या निवासस्थानी भेट घेऊन याप्रश्‍नी चर्चा केली, तसेच निवेदनही दिले. यावेळी मुख्यमंत्र्यांनी केंद्र सरकारशी चर्चा करण्याचे आश्‍वासन दिले.
हेही वाचा - पीएमसी बँक : जॉय थॉमसच्या दुसऱ्या पत्नीच्या नावावर पुण्यात 9 फ्लॅट
पंजाब आणि महाराष्ट्र बँकेतील सामान्य खातेदारांचा या घोटाळ्याशी काही संबंध नसतानाही त्यांना नाहक त्रास सहन करावा लागत आहे. अशा खातेदारांना लवकरच दिलासा मिळावा, यासाठी रवींद्र वायकर यांनी मुंबई उच्च न्यायालयात रिट याचिका (डब्ल्युपी २९१८ ऑफ १९, तारीख ११ ऑक्टोबर २०१९) दाखल केली आहे.
हेही वाचा - 22 ऑक्टोबरला बँका बंद, कर्मचारी पुकारणार देशव्यापी संप
