'आयुष्यमान भारत' योजनेच्या जनजागृतीसाठी रेल्वे प्रशासन सरसावले

आरोग्य शिबिरांमुळे रेल्वेसोबत काम करणाऱ्या गरजू नागरिकांना, तसेच नागरिक आयुष्यमान भारत प्रधानमंत्री जन आरोग्य योजनेंतर्गत पात्र लाभार्थी आहेत का? हे जाणून घेण्यासाठी मदत होणार आहे. या शिबिरांमुळे ई कार्ड प्राप्त करून घेण्यासाठीही मदत होणार आहे.

मुंबई - आयुष्यमान भारत प्रधानमंत्री जन आरोग्य योजनेबाबत सामान्य नागरिकांना माहिती मिळावी, या योजनेचा लाभ नागरिकांपर्यत पोहचावा, यातून सदृढ देशाची निर्मिती व्हावी, यासाठी राष्ट्रीय स्वास्थ्य प्राधिकरणाने मध्य आणि पश्चिम रेल्वे यांच्यामार्फत जनजागृती अभियान राबविण्यात येत आहे. त्याचाच एक भाग म्हणून मुंबई सेंट्रल रेल्वे स्थानकात कार्यक्रम घेण्यात आला. या कार्यक्रमाला मोठ्या प्रमाणात कर्मचारी आणि प्रवाशांनी उपस्थिती दर्शवली.

या आरोग्य शिबिरांमुळे रेल्वेसोबत काम करणाऱ्या गरजू नागरिकांना, तसेच नागरिक आयुष्यमान भारत प्रधानमंत्री जन आरोग्य योजनेंतर्गत पात्र लाभार्थी आहेत का? हे जाणून घेण्यासाठी मदत होणार आहे. या शिबिरांमुळे ई कार्ड प्राप्त करून घेण्यासाठीही मदत होणार आहे.

रेल्वे मंत्रालयाने या वर्षाच्या सुरुवातीला राष्ट्रीय स्वास्थ्य प्राधिकरणाबरोबर १७ प्रभागातील ९१ रुग्णालयांसोबत करार केला आहे. प्रधानमंत्री जन आरोग्य योजनेबाबत रेल्वे रुग्णालयांमध्ये कार्यपद्धती सुरळीतपणे होण्यासाठी आणि जागरुकता वाढविण्यासाठी हे एक महत्वपूर्ण पाऊल आहे. राष्ट्रीय स्वास्थ्य प्राधिकरण, लाभार्थी ओळख आणि जनजागृती मोहीम मुंबई सेंट्रल (पश्चिम रेल्वे) आणि छत्रपती शिवाजी महाराज टर्मिनस (मध्य रेल्वे ) या २ रेल्वे स्थानकांवर राबविण्यात आली.