मुंबई - आज (गुरुवारी) महाराष्ट्र नवनिर्माण सेनेचे महाअधिवेशन आयोजित करण्यात आले आहे. यावेळी मनसेच्या झेंड्याचा रंग भगव्या रंगात बदलण्यात आला. मनसे कार्यकर्त्यांकडून राज ठाकरे यांना हिंदुहृदयसम्राट अशी देखील उपमा देण्यात आली.
शिवसेनाप्रमुख बाळासाहेब ठाकरे यांच्या 94 व्या जयंतीनिमित्त शिवाजी पार्क येथील बाळासाहेब ठाकरे स्मृती स्थळावर अभिवादन करण्यासाठी अनेक नेतेमंडळींनी गर्दी केली होती. यावेळी राज ठाकरेंच्या या निर्णयावर अनेक नेत्यांनी आपल्या प्रतिक्रिया व्यक्त केल्या आहेत.
हेही वाचा - 'मनसे'त सहभागी होण्याचा प्रश्नच येत नाही; शिवसैनिकांनी स्पष्ट केली भूमिका
काय म्हणाले नेते?
बाळासाहेब ठाकरे यांच्यासारख्या व्यक्ती सदैव आपल्यासोबत असतात. इथे आल्यावर ऊर्जा मिळते, प्रेरणा मिळते. ज्या देशामध्ये हिंदुत्वाचे विचार जास्तीत जास्त लोक आत्मसात करत असतील तर त्यांचे आम्ही स्वागत करतो. राज ठाकरे यांच्या मनसेने घेतलेल्या हिंदुत्वाच्या मुद्द्याचे स्वागत आहे. - संजय राऊत, शिवसेना खासदार
मनसेला फार गंभीरपणे घेण्याची आवश्यकता नाही. कोणत्या पक्षांनी काय करावे हा त्यांचा प्रश्न आहे. शिवसेनेचा स्वतःचा झेंडा आहे, स्वतःचे तत्त्व आहे. त्यामुळे यावर फार चर्चा करण्याची आवश्यकता नाही. - अजय चौधरी, आमदार
कोणी काही बोलले तरी हिंदूहृदयसम्राट हे फक्त बाळासाहेब ठाकरे होते आणि भारताला माहीत आहे. त्यामुळे भविष्यातही बाळासाहेबच हिंदुहृदयसम्राट म्हणून ओळखले जाणार आहेत. - दीपक केसरकर, आमदार
महाराष्ट्र नवनिर्माण सेनेचा विरोध हा शिवसेनाप्रमुख बाळासाहेब ठाकरे असताना होता. त्याच्यानंतर ही उद्धव ठाकरे यांच्या नेतृत्वखाली शिवसेना योग्य दिशेने चालली आहे. तसेच महाराष्ट्राचा मुख्यमंत्री देखील शिवसेनेचाच आहे. - रवींद्र वायकर, आमदार
हिंदुत्वाचा मुद्दा फक्त आणि फक्त शिवसेना चालवू शकते. - चंद्रकांत खैरे, माजी खासदार
वेगवेगळे मार्ग मनसे शोधत आहे. कपडे व झेंडे बदलल्याने विचारधारा बदलत नाही. शिवसेनेला काही आव्हान नाही. शाडो कॅबिनेटने काही होणार नाही. मनसेने नाही तर प्रत्येक नागरिकाने सरकारवर लक्ष ठेवले पाहिजे. 'मैं भी चौकीदार' आता मनसे राहणार आहे. - मनीषा कायंदे, आमदार
