मुंबई - शहरातील खड्डे, आणि त्यामध्ये पावसाळ्यात पाणी तुंबणे यावर आरजे मलिष्काने गाणी बनवून मुंबई पालिकेवर टीका केली होती. त्यामुळे यंदा खुद्द आयुक्तांनी टीका करणाऱ्या मलिष्कालाच सोबत घेऊन नालेसफाई व इतर कामांचे सादरीकरण केले आहे. त्यामुळे आयुक्तांनीच मलिष्कापुढे पायघड्या घातल्याने सत्ताधारी शिवसेनेकडून आणि विरोधकांकडून नाराजी व्यक्त करण्यात येत आहे.
त्यामुळे मुंबई महापालिकेचा कारभार जाहिरातबाजीवर चालला, असल्याचा आरोप विरोधी पक्षांकडून करण्यात आला आहे. रेड एफ-एफ - ९३.५ ची आरजे मलिष्काने ‘मुंबई तुला बीएमसीवर भरवसा नाय काय’ आणि ‘मुंबई गेली खड्ड्यात', अशी गाणी तयार करून जागतिक दर्जा असणाऱया मुंबई महापालिकेची नाचक्की केली होती. त्यामुळे आता यंदा पुन्हा एखादे पालिकेवर गाणे यायला नको, म्हणून पालिकेने विकास कामांची माहिती देण्यासाठी मलिष्काला निमंत्रण दिले.
मलिष्का हिने तिचे सहकारी आणि अभिनेते अजिंक्य देव यांच्यासह वरळी येथील पालिकेचे लव्हग्रोव्ह पंपिंग स्टेशन आणि पालिका मुख्यालयातील अपात्कालीन कक्षाला भेट दिली. यावेळी खुद्द पालिका आयुक्त प्रवीणसिंह परदेशी, अतिरिक्त आयुक्त विजय सिंघल, अश्विनी जोशी, आबासाहेब जर्‍हाड आदी अधिकारी उपस्थित होते. या भेटीदरम्यान आयुक्त प्रविणसिंह परदेशी यांनी पावसापूर्वी केलेल्या कामाची माहिती मलिष्काला दिली.
याप्रकरणी सत्ताधाऱ्यांनी पालिका आयुक्तांना 'स्वतःवर भरोसा नाही का'? अशी टीका करत महापौर, गटनेते आणि इतर नगरसेवकांना प्रशासनाने विश्वासात घ्यायला हवे होते, असे मत मांडले आहे. त्यामुळे या भेटीनंतर आम्ही विरोध दर्शविला आहे, अशी माहिती स्थायी समिती अध्यक्ष यशवंत जाधव यांनी दिली.
पालिकेचा कारभार जाहिरातबाजीवर -
आपण निष्क्रिय ठरणार आहोत हे माहीत असल्याने आपल्यावर तिसरे गाणे येऊ नये, म्हणून प्रशासनाने मलिष्कासमोर पायघड्या घातल्या आहेत. पावसाळ्यापूर्वी जी कामे केली आहेत, ती कामे नगरसेवक, गटनेत्यांना दाखवावी, असे प्रशासनाला वाटलेले नाही. त्यामुळे पालिकेचा कारभार जाहिरातबाजीवर चालला आहे. हा पायंडा चुकीचा आहे, अशी प्रतिक्रिया राष्ट्रवादीच्या गटनेत्या राखी जाधव यांनी दिली आहे.
