मनसेच्या झेंड्यासोबत राजकीय भूमिकाही बदलणार? महाधिवेशनात ठरणार 'इंजिना'ची दिशा

मनसेचा नवा झेंडा भगवा किंवा केसरी यापैकी एका रंगाचा असेल, अशी माहिती मिळत आहे. मनसेने आपल्या पक्षाच्या झेंड्याचा रंग भगवा, हिरवा आणि निळा ठेवून हिंदू, मुस्लीम आणि दलितांना आपल्याकडे खेचण्याची रणनीती आखली होती. मात्र निवडणुकीच्या राजकारणात मनसेला अपेक्षित यश मिळत नसल्याने ते आपली भूमिका बदलण्याच्या तयारीत दिसत आहे.

मुंबई - मराठी माणसाच्या न्याय हक्कासाठी म्हणून स्थापन झालेल्या महाराष्ट्र नवनिर्माण सेनेने आता हिंदुत्वाचं कार्ड खेळण्याचा निर्णय घेतला असल्याची माहिती समोर येत आहे. शिवसेनेने काँग्रेस आणि राष्ट्रवादी काँग्रेस पक्षासोबत महाआघाडी स्थापन केल्यानंतर शिवसेनेची जागा घेण्याचा प्रयत्न मनसे करणार आहे. मनसे आपल्या पक्षाच्या झेंड्याचा रंगही बदलणार असून येत्या 23 जानेवारीला होत असलेल्या मनसेच्या महाअधिवेशनात राज ठाकरे याबाबतची घोषणा करणार आहेत, अशी माहिती सूत्रांनी दिली.

नव महाराष्ट्राची निर्मिती तसेच मराठी माणसाच्या मुद्द्यावर राज ठाकरे यांनी 9 मार्च 2006 ला महाराष्ट्र नवनिर्माण सेना पक्षाची स्थापना केली. सुरुवातीला टोल, दुकानांवर मराठी पाट्या आणि रेल्वे भरतीमध्ये मराठी माणसाला प्राधान्य या मुद्यावर मनसेने केलेल्या आंदोलनाला चांगलाच प्रतिसाद मिळाला. 2009 साली झालेल्या पहिल्याच विधानसभा निवडणुकीत मनसेचे 13 आमदार निवडून आले. त्यानंतर मात्र, मनसेचे हे मराठी कार्ड फार चालले नाही. 2014 आणि 2019 च्या विधानसभा निवडणुकीत मनसे अध्यक्ष राज ठाकरे यांची मोठी दमछाक झाली. या दोन्ही निवडणुकीत त्यांचा एक-एकच आमदार निवडून आला. मनसे अध्यक्षांच्या सभेला होणाऱ्या गर्दीचे मतात परिवर्तन झाले नाही. त्यामुळेच आता मनसे अध्यक्ष राज ठाकरे यांनी आपली राजकीय भूमिका बदलण्याचा निर्णय घेतला असल्याचे समजते.

शिवसेना पक्ष प्रमुख बाळासाहेब ठाकरे यांच्या पावलावर पाऊल टाकत ते हिंदुत्वाचा मुद्दा हातात घेऊन राजकीय खेळी खेळणार असल्याची चर्चा रंगली आहे. यासाठी मनसेच्या झेंड्यांचा रंगही बदलण्यात येणार असल्याची माहिती मिळत आहे. मनसेचं पहिलं महाधिवेशन 23 जानेवारीला गोरेगाव मध्ये संपन्न होणार आहे. या महाअधिवेशनात राज ठाकरे आपली नवी राजकीय भूमिका स्पष्ट करणार आहेत.

मनसेचा नवा झेंडा भगवा किंवा केसरी यापैकी एका रंगाचा असेल, अशी माहिती मिळत आहे. मनसेने आपल्या पक्षाच्या झेंड्याचा रंग भगवा, हिरवा आणि निळा ठेवून हिंदू, मुस्लीम आणि दलितांना आपल्याकडे खेचण्याची रणनीती आखली होती. मात्र निवडणुकीच्या राजकारणात मनसेला अपेक्षित यश मिळत नसल्याने ते आपली भूमिका बदलण्याच्या तयारीत दिसत आहे.