मुंबई : राज्यातील सत्ता संघर्षाचा निकाल कोणत्याही क्षणी लागण्याची शक्यता असताना विधानसभा अध्यक्ष राहुल नार्वेकर यांनी एक मोठं वक्तव्य केलं आहे. निलंबनाची कारवाई केवळ अध्यक्षच करू शकतात, अन्य कुठलीही संस्था ही कारवाई करू शकत नाही असे त्यांनी म्हटले आहे. त्यांच्या या विधानानंतर राजकीय वर्तुळात खलबल उडाली असून सत्ता संघर्षाच्या निकाला दरम्यानच एका खाजगी कार्यक्रमासाठी ते लंडन दौऱ्यावरही जाणार आहेत.
कुठलीही संस्था कारवाई करू शकत नाही : राज्यातील सत्ता संघर्षाचा निकाल कुठल्याही क्षणी लागण्याची शक्यता असून या निकालाकडे संपूर्ण देशाचे लक्ष लागून राहिलेल आहे. या निकालानंतर भविष्यातील राजकीय घडामोडी ठरवल्या जाणार आहेत. अशातच विधानसभा अध्यक्ष राहुल नार्वेकर यांनी एक मोठं वक्तव्य केलं आहे. आमदार अपात्रेतवर अतिशय महत्त्वाचं असे हे वक्तव्य आहे.
निलंबनाची कारवाई केवळ अध्यक्षच करू शकतात अन्य कुठलीही संस्था ही कारवाई करू शकत नाही - राहुल नार्वेकर
विरोधक कोर्टत जाऊ शकतात : त्यांच्या या वक्तव्याने राजकीय वर्तुळात खलबल उडाली आहे. राहुल नार्वेकर यांनी सांगितले आहे की, कोर्टाने जरी शिंदे गटाला अपात्र मानलं तरी सुद्धा ते ठरवण्याचा अधिकार हा विधानसभा अध्यक्षांकडे सोपवला जाईल. त्या कारणाने तो माझा अंतिम निर्णय राहील. तसेच त्यावर ज्यांना आक्षेप असेल ते कोर्टात जाऊ शकतात असेही नार्वेकरांनी म्हटल आहे.
नार्वेकर लंडन दौऱ्यावर : एकीकडे सत्ता संघर्षाचा निकाल या आठवड्यात अपेक्षित आहे. न्यायालयाच्या निकालानंतर विधानसभा अध्यक्ष राहुल नार्वेकर यांची भूमिका महत्त्वाची असताना राहुल नार्वेकर हे ११ ते १५ मे या कालावधीत लंडन दौऱ्यावर जाणार आहेत. सत्ता संघर्षाच्या निकालाकडे फक्त महाराष्ट्राच नाही तर, संपूर्ण देशाच लक्ष लागलेलं आहे. महत्त्वाच्या निकालानंतर त्याच्या अंमलबजावणीसाठी विधानसभा अध्यक्ष राहुल नार्वेकर यांची भूमिका महत्त्वाची असणार आहे. हे सर्व माहीत असतानांसुद्धा राहुल नार्वेकर हे लंडनच्या दौऱ्यावर जात असल्याने आश्चर्य व्यक्त केले जात आहे. लंडनला ते एका खाजगी संस्थेच्या कार्यक्रमाला उपस्थित राहण्यासाठी जात आहेत. तिथे ते राष्ट्रकुल मंडळा सोबत एक महत्त्वाची बैठक सुद्धा ते घेणार आहेत. राष्ट्रकुल मंडळाचे शिबिर मुंबईत आयोजित करण्यासाठी ते प्रयत्न करणार असल्याचे समजते.
केंद्रीय कायदा मंत्री, राज्यपाल भेटीगाठी : मागच्याच आठवड्यात मुंबईत एका कार्यक्रमानिमित्त आलेले केंद्रीय कायदामंत्री किरण रिजिजू यांनी विधानसभा अध्यक्ष राहुल नार्वेकर यांची भेट घेतली होती. सत्ता संघर्षाच्या निकालानंतर ज्या काही राजकीय घडामोडी घडणाऱ्या आहेत. त्या दृष्टीच्या अनुषंगाने ही भेट झाल्याची चर्चा रंगली होती. तर दुसऱ्या क्षणी मुख्यमंत्री एकनाथ शिंदे यांनी राज्यपाल रमेश बैस यांची राजभवनावर भेट घेतली होती. सर्वोच्च न्यायालयाच्या निकालात शिंदे गटाला अपात्र ठरवल्यास किंवा राष्ट्रवादीचा गट भाजप सोबत गेल्यास राज्यपाल, रमेश बैस, विधानसभा अध्यक्ष, राहुल नार्वेकर या दोघांची भूमिका महत्त्वपूर्ण असल्याकारणाने या भेटीला महत्त्व आले होते.
राज्याच्या सत्ता संघर्षावर कायदेतज्ञ असिम सरोदे यांनी चार शक्यता वर्तवल्या आहेत
१) आमदार अपात्रतेचा निर्णय फक्त विधानसभा अध्यक्षांकडे पाठवून स्वीकारला जाऊ शकतो.
२) तत्कालीन राज्यपाल भगतसिंह कोश्यारी यांनी बहुमत चाचणीबाबत दिलेला आदेश रद्द केला जाऊ शकतो. राज्यपालांची कारवाई घटनाबाह्य असल्याने ती रद्दबातल ठरते.
3) थेट न्यायालय 16 आमदारांना पक्षविरोधी कारवायांसाठी अपात्र ठरवू शकते, न्यायालय घटनेच्या कलम 142 चा वापर करू शकते.
4) 10 व्या घटनादुरुस्तीवरील पूर्वीच्या निर्णयांशी संबंधित हे प्रकरण, उच्च घटनात्मक गुंतागुंतीमुळे विचारात घेतले जाण्याची अस्पष्ट शक्यता आहे. तसेच हे प्रकरण 7 न्यायाधीशांच्या घटनापीठाकडे पाठवले जाऊ शकते.
- Chhatrapati Shivaji Maharaj Statue : 'येथे' उभारणार छत्रपती शिवाजी महाराजांचा जगातील सर्वात मोठा सिंहासनारूढ पुतळा
- The Kerala Story : मालवणी परिसरात राहणाऱ्या महिलांना 'द केरळ स्टोरी'ची मेजवानी, चित्रपटाला प्रेक्षकांचे भरभरून प्रेम
- Nitin Gadkari News: ...म्हणून २००४ मध्ये अपघातात संपुर्ण कुटुंब वाचले- नितीन गडकरी
