मुंबई - ना. म. जोशी मार्ग बीडीडी चाळ पुनर्विकास प्रकल्पाअंतर्गत 272 घरासाठी उद्या (गुरुवारी) लॉटरी काढण्याची तयारी म्हाडाच्या मुंबई मंडळाकडून झाली होती. मात्र, आज (बुधवारी) रात्री उशिरा मंडळाने ही लॉटरी पुढे ढकलत 3 नोव्हेंबरला काढण्यात येईल, असे जाहीर केले आहे. गुरुवारी साडे बारा वाजता ही लॉटरी काढण्यात येणार होती. मात्र, कॅबिनेटच्या बैठकीमुळे लॉटरीसाठी वेळ अपुरा पडत असल्याने, सर्व मंत्री, आमदारांना उपस्थित राहणे शक्य होत नसल्याने ही लॉटरी 3 नोव्हेंबरला घेण्याचा निर्णय घेण्यात आल्याची माहिती मुंबई मंडळाचे सहमुख्य अधिकारी जीवन गलांडे यांनी दिली. ते 'ईटीव्ही भारत'शी बोलत होते.
पात्र रहिवाशांना पुनर्वसित इमारतीत कुठे आणि कितव्या मजल्यावर घर मिळणार हे या लॉटरीद्वारे निश्चित केले जाणार आहे. तर रहिवाशांना ही यामुळे एक हमी आणि सुरक्षितता मिळणार आहे. त्यामुळे या लॉटरीकडे रहिवाशांचे विशेष लक्ष होते. त्यानुसार 29 ऑक्टोबरला लॉटरी काढण्याची सर्व तयारी मंडळाने केली होती. रहिवाशांनाही याची माहिती दिली होती. मंत्र्यांची वेळही घेतली होती. मात्र, बुधवारची कॅबिनेट गुरुवारी बोलण्यात आल्याने मंडळाची अडचण वाढली. काही झाले तरी उद्या लॉटरी घ्यायची यासाठी आज मंडळाचे प्रयत्न सुरू होते. मात्र, शेवटी लॉटरी योग्यरित्या पार पाडावी आणि कोणत्याही अडचणी येऊ नये असा विचार करत लॉटरी 3 नोव्हेंबरला काढण्याचा निर्णय घेतल्याचे गलांडे यांनी सांगितले आहे.
म्हाडा मुख्यालयात 3 नोव्हेंबरला 3 वाजता ही लॉटरी पार पडणार आहे. गृहनिर्माण मंत्री जितेंद्र आव्हाड यांच्या हस्ते तर मुंबई शहराचे पालकमंत्री अस्लम शेख, पर्यावरण मंत्री आणि मुंबई उपनगराचे पालकमंत्री आदित्य ठाकरे यांच्या उपस्थितीत हा कार्यक्रम होणार आहे. तर मुंबईच्या महापौर किशोरी पेडणेकर आणि म्हाडाचे सर्व अधिकारी यावेळी उपस्थित असणार आहेत. कोरोनाच्या पार्श्वभूमीवर या कार्यक्रमाचे वेबकास्टिंग करण्यात येणार आहे. http://mhada.ucast.in या लिंकवर या कार्यक्रमाचे थेट प्रेक्षपण करण्यात येणार आहे. म्हाडाच्या अधिकृत https://mhada.gov.in या संकेतस्थळावर ही लिंक उपलब्ध करून देण्यात येणार आहे.
दरम्यान, या लॉटरीद्वारे 272 रहिवाशांना घराची हमी मिळणार आहेच. मात्र, यामुळे इतर रहिवाशांनाही म्हाडाबद्दल, पुनर्विकासाबद्दल विश्वास निर्माण होईल, अशी अपेक्षा यानिमित्ताने व्यक्त केली जात आहे. तर पुढे पुनर्विकास मार्गी योग्यरित्या, विरोध कमी करत लावण्यासाठी मदत होईल, अशी ही आशा म्हाडाला आहे.
