मुंबई - प्रथम नागरिक असलेल्या महापौरांच्या कुटुंबीयांना महापालिकेकडून मिळणारी गाडी किशोरी पेडणेकर यांनी नाकारल्यानंतर आता त्यांनी आपले एक वर्षाचे मानधन महापौर निधीसाठी दिले आहे. महापौर निधीमधून मदत मागण्यासाठी मोठ्या प्रमाणात गरीब रुग्ण येतात. जास्तीत जास्त गरजूंना ही मदत मिळावी म्हणून आपले एक वर्षाचे मानधन महापौर निधीसाठी दिल्याचे महापौरांनी सांगितले.
हेही वाचा - 'भाजप सरकार नसल्यानेच शांततेने आंदोलन करता आले', मुंबईतील आंदोलकांचे मत
मुंबईच्या महापौरांना आणि त्यांच्या कुटुंबीयांना दोन वाहने दिली जातात. त्यापैकी कुटुंबीयांना मिळणारी गाडी महापौर किशोरी पेडणेकर यांनी पदावर विराजमान होताच नाकारली आहे. त्या गाडीवर होणारा खर्च महापौर निधीमध्ये जमा करावा, अशी मागणी त्यांनी केली होती. महापौर निधीला मदत करणाऱ्या दात्यांना ५० टक्केच इन्कम टॅक्समधून सूट मिळते, ही सूट १०० टक्के मिळावे त्यासाठी पाठपुरावा सुरू असल्याचे महापौरांनी सांगितले.
महापौर निधीमधून आर्थिक मदत मिळावी म्हणून गरीब व गरजू रुग्णांकडून मोठ्या संख्येने अर्ज येत आहेत. यामधील जास्तीत जास्त गरजू रुग्णांना मदत करता यावी म्हणून महापौर पदावर निवड झाल्यापासून नोव्हेंबर, डिसेंबर या दोन महिन्याचे मानधन किशोरी पेडणेकर यांनी महापौर निधीसाठी दिले आहे. तसेच जानेवारी ते डिसेंबर 2020 या पुढील वर्षाचे मानधनही महापौर निधीमध्ये जमा करावे, असे पत्र महापौरांनी पालिका प्रशासनाला दिले आहे.
हेही वाचा - 'अग्निसुरक्षा, आरोग्य प्रमाणपत्र नसताना मुंबईतील हॉटेल्स सुरू कशी'
निधी वाढवण्यासाठी प्रयत्न सुरू -
महापौर निधीमध्ये वाढ व्हावी म्हणून पालिका कर्मचाऱ्यांचा एक दिवसाचा पगार द्यावा, असे आवाहन केले. त्याबाबत कर्मचारी युनियनसोबत बैठका सुरू आहेत. त्यांनी त्यासाठी सकारात्मक भूमिका घेतली आहे. नगरसेवकांना आपले एक महिन्याचे मानधन महापौर निधीसाठी द्यावे, असे आवाहन केले. 227 पैकी अनेक नगरसेवकांनी आपले मानधन निधीसाठी द्यावे असे पत्र दिले आहे. लवकरच 'महापौर रजनी' हा कार्यक्रम आयोजित करणार असल्याचे महापौरांनी सांगितले.
काय आहे महापौर निधी -
मुंबईमधील गरीब व गरजू रुग्णांना मुंबईच्या महापौर निधीमधून आर्थिक मदत केली जाते. महापौर निधीमधून २०११ पासून प्रत्येक गरजू रुग्णाला ५ हजार रुपये इतकी मदत केली जात होती. महापौर निधीमधून देण्यात आलेले ५ हजार रुपयांचे धनादेश अनेक रुग्णालये स्वीकारत नव्हते. यामुळे महापौर मदत निधीमध्ये १५ हजार रुपये इतकी वाढ करण्यात आली. हृदय शस्‍त्रक्रिया तसेच किडणीरोपण या आजारांच्‍या रुग्णांना प्रत्‍येकी २५ हजार डायलेसीसच्‍या रुग्‍णांकरिता १५ हजार रुपये अधिक मदत केली जाते.
