मुंबई - विक्रोळी पार्कसाईट विभागात विवाहित महिलेची गळा दाबून हत्या केल्याची घटना समोर आली आहे. शीतल सचिन दळवी (वय 26) असे मृत महिलेचे नाव आहे. बुधवारी दुपारच्या सुमारास शेजारच्या रहिवाशांना शीतल मृत अवस्थेत आढळून आली. तपासात तिची गळा दाबून हत्या केल्याचे स्पष्ट झाले होते. त्यानंतर पोलिसांनी हत्येचा गुन्हा दाखल करुन संशयित पतीला अटक केली.
शीतल दळवी ही पती सचिन दळवी (वय 34) व मुला सोबत विक्रोळी पार्क साईट विभागात रामनगर येथील कांबळे चाळीत एका भाड्याच्या खोलीत राहत होती. पती - पत्नीचे मंगळवारी रात्री कडाक्याचे भांडण झाले होते. पती सचिन हा बुधवारी सकाळीच घरातून बाहेर गेला होता. शीतलच्या घराचा दरवाजा उघडा असल्याने शेजारच्या राहिवाशांनी घरात डोकावून पाहिले. तर शीतल निपचित घरात पडून होती. शेजारच्यांनी नजीकच्या डॉक्टरला बोलावून तपासणी केली. त्यात डॉक्टरांनी शीतलला मृत असल्याचे घोषित केले. त्यानंतर शेजारील नागरिकांनी पार्क साईट पोलिसांना सदर घटनेची माहिती दिली.
पार्कसाईट पोलिसांनी महिलेचा शव ताब्यात घेऊन तो राजावाडी रुग्णालयात शवविच्छेदनसाठी दाखल केला. शवविच्छेदन करून रुग्णालयाने दिलेल्या अहवालात गळा दाबून हत्या केल्याचे समोर आले. या प्रकरणी पार्क साईट पोलिसांनी हत्येचा गुन्हा दाखल केला. मृत महिलेच्या पतीचा मोबाइल बंद होता. तसेच बुधवारी सकाळपासून घरी नसल्याने पोलिसांनी पती सचिन दळवी वर संशय व्यक्त केला होता. या प्रकरणी पतीला अटक केली असल्याचे माहिती पोलिसांनी दिली. पूढील तपास पार्क साईट पोलीस करीत आहेत.