मुंबई: विमानात प्रवास करताना बेशिस्त पद्धतीने प्रवास करण्याच्या घटना सतत वाढत आहेत. विमानातून बेशिस्त पद्धतीने प्रवास करणाऱ्या प्रवाशांची संख्या सातत्याने वाढत आहे. बँकॉकहून इंडिगोच्या विमानातून प्रवास करणाऱ्या एका स्वीडिश वृद्ध प्रवाशाने केबिन क्रू सदस्याचा विनयभंग केल्याचे समोर आले आहे. या प्रकरणी प्रवाशाला कोर्टाकडून जामीन मंजूर झाला आहे.
गुन्हा दखल, जामीन : गुरुवारी बँकॉकहून इंडिगो विमानाचा चार तासांचा प्रवास करून स्वीडिश नागरिक असलेला एरिक हॅराल्ड जोनास वेस्टबर्ग हा ६३ वर्षीय नागरिक मुंबईत येत होता. या प्रवासादरम्यान वेस्टबर्ग याने एका २४ वर्षीय केबिन क्रू सदस्याचा विनयभंग केला. यावेळी त्याला इतर केबिन क्रू सदस्यांनी हटकले असता त्यांच्यावर हल्ला केला. घटनेच्या वेळी वेस्टबर्ग हा मद्यधुंद अवस्थेत होता.
जामिनावर सोडले : विमान मुंबईत पोहचताच वेस्टबर्ग याला स्थानिक पोलिसांच्या ताब्यात देण्यात आले. विनयभंग झालेल्या क्रू सदस्याच्या तक्रारीवरून वेस्टबर्ग याच्यावर गुन्हा दाखल करण्यात आला आहे. त्याला शुक्रवारी न्यायालयात सादर केले असता त्याला २० हजार रुपयांच्या जामिनावर सोडले आहे. जामिनावर सुटल्याने त्याला आता दरवेळी सुनावणी दरम्यान कोर्टात हजर रहावे लागणार आहे.
बेशिस्तीच्या घटना वाढल्या : आतापर्यंत बस, रेल्वे यामधून प्रवास करणारे प्रवासी बेशिस्त असल्याचे अनेक वेळा समोर आले आहे. विमान प्रवासी हाय क्लास मानले जाते. मात्र आता हेच हाय क्लास प्रवासी बेशिस्तपणे वागत असल्याने अशा घटना वाढत असल्याचे समोर आले आहे. २०१७ मध्ये १, २०१८ मध्ये २, २०१९ मध्ये ३, २०२२ मध्ये ६ तर २०२३ मध्ये ३ महिन्यात ८ घटना बेशिस्त पद्धतीने प्रवास करण्याच्या नोंदवण्यात आल्या आहेत. गेल्या काही वर्षात २०२३ मध्ये बेशिस्त पद्धतीने प्रवास करणाऱ्या प्रवाशांची संख्या वाढली आहे.
काल इंडिगो विमानात एक घटना घडली: मुंबईहून गोरखपूरला येणाऱ्या इंडिगो विमानाच्या टॉयलेटमध्ये एका प्रवाशाने गुपचूप सिगारेट ओढली. त्यामुळे विमानाचा फायर अलार्म वाजला. यावर क्रू मेंबर्स आले त्यांनी प्रवाशाला ताबडतोब सिगारेट विझवण्यास सांगितले. फायर अलार्म वाजल्याने प्रवासी काही काळ घाबरले होते. विमान गोरखपूर विमानतळावर उतरल्यानंतर प्रवाशाविरुद्ध गुन्हा दाखल करून त्याला अटक करण्यात आले होते.
