मुंबई - काँग्रेस हायकमांडने जबाबदारी दिली तर, नक्कीच मुख्यमंत्री होईल, असे संकेत नाना पटोले यांनी पुन्हा एकदा दिले आहेत. मात्र, सध्या राज्यात महाविकास आघाडी सरकार असून हे सरकार मुख्यमंत्री उद्धव ठाकरे यांच्या नेतृत्वाखाली पाच वर्ष काम करेल. या सरकारला काँग्रेसचा पूर्ण पाठिंबा असेल, असे देखील यावेळी त्यांनी स्पष्ट केले.
'मी कोणतेही पद काँग्रेस पक्षश्रेष्ठींकडून कधीही मागितले नाही' -
मुख्यमंत्री कोण होणार हे काँग्रेसचे हायकमांड ठरवेल. दिल्लीतील हायकमांडने मुख्यमंत्री पदाची जबाबदारी सोपवली, तर मी मुख्यमंत्री होईल, असे संकेत काँग्रेसचे प्रदेशाध्यक्ष नाना पटोले यांनी दिले आहेत. यासोबतच 2024 मध्ये होणाऱ्या विधानसभा आणि लोकसभा निवडणुका महाराष्ट्रात काँग्रेस स्वबळावर लढवेल, असे संकेतही नाना पटोले यांनी पत्रकार परिषदेमध्येतून दिले. मी कोणतेही पद काँग्रेस पक्षश्रेष्ठींकडून कधीही मागितले नाही. विधानसभा अध्यक्ष पद आणि काँग्रेस प्रदेशाध्यक्ष पद मी कधीही मागितले नव्हते. मात्र, या पदाची जबाबदारी काँग्रेस हायकामांडने माझ्यावर सोपवली आणि ती जबाबदारी योग्यरीत्या पार पाडण्याचे काम केले, असेही यावेळी नाना पटोले यांनी सांगितले.
'पाच वर्ष उद्धव ठाकरे हेच मुख्यमंत्री'
महाविकास आघाडी तयार करत असताना उद्धव ठाकरे यांच्या नेतृत्वाखाली महाविकास आघाडी सरकार काम करेल, हे काँग्रेसच्या हायकमांडने ठरवलेल आहे. त्यामुळे हे पाच वर्ष उद्धव ठाकरे हेच मुख्यमंत्री असतील आणि त्यांना काँग्रेसचा पूर्ण पाठिंबा असेल, असे देखील नाना पटोले यांनी स्पष्ट केले. मात्र, 2024 च्या विधानसभा निवडणुकीत काँग्रेस स्वतंत्रपणे लढवणार असल्याचेही यावेळी ते म्हणाले.
'राम मंदिराच्या नावावर भाजपची दुकानदारी' -
सध्या राम मंदिराच्या जागेच्या खरेदीवरून घोटाळा होत असल्याची चर्चा आहे. यावरूनच नाना पटोले यांनी पुन्हा एकदा भाजपवर निशाणा साधला. दोन कोटीची जमीन अठरा कोटी रुपयाला विकल्याने यात भाजपचा खरा चेहरा समोर आल्याची टीका नाना पटोले यांनी केली. राम मंदिराच्या नावावर भाजपाने नेहमीच दुकानदारी केली आहे. राम मंदिराच्या वर्गणीच्या नावाखाली 1400 कोटी रुपये जमा करण्यात आले. यावर काँग्रेसने आक्षेप घेतल्यानंतर ही वर्गणी जमा करण्याचे बंद करण्यात आले, असा आरोप नाना पटोले यांच्याकडून लावण्यात आला आहे.
