मुंबई - भाजपचा मुख्यमंत्री आम्हाला नको, त्यांचे राजकारण हे घातक आहे. आमदारांना दम देण्याचे काम केले जात आहे. महाराष्ट्रात वाईट परिस्थिती निर्माण झाली आहे. बुलेट ट्रेनसाठी महाराष्ट्र पैसे घालतो, त्यातून गुजरातचे भले होणार आहे. समजुतीने सगळे घडत असते, केंद्रातून बाहेर पडण्याचा निर्णय त्यांना हवे तर ते घेतीलच. काँग्रेस, राष्ट्रवादीच्या बैठका सुरू आहेत. शिवसेनेचा मुख्यमंत्री होणार की, नाही यावर चर्चा होऊ शकते, पण भाजपचा मुख्यमंत्री नको, असे मत काँग्रेसचे नेते हुसेन दलवाई यांनी व्यक्त केले.
शरद पवार आणि सोनिया गांधी यांनी एकत्र येऊन निर्णय घ्यावेत, असे दलवाई यांनी म्हटले. त्यांनी आज सामना कार्यालयात शिवसेना नेते संजय राऊत यांची भेट घेतली, त्यावेळी ते बोलत होते. राजकारण सटासट होत नसते, टोपी घातली आणि काढली, इतके सोपे नसते, राष्ट्रपती राजवट नको आहे. भाजपकडे आमदारांची संख्या जास्त आहे तर त्यांनी राज्यपालांची भेट घेऊन सरकार स्थापन करावे.
हेही वाचा - ज्येष्ठ नेत्यांमध्ये भेटीगाठी होतच असतात - बाळासाहेब थोरात
ईडीला आता कोणी घाबरत नाही. हा देश जर्मन नाही तर शिवाजी महाराजांचे राज्य आहे. भाजपपेक्षा शिवसेना कधीही चांगली आहे. भाजपचे राजकारण हे आरएसएसचे राजकारण आहे, राष्ट्रीय स्वयंसेवक संघाचे सरकार आहे. ज्यांना आंदोलनाचा गंध नाही, अशा सरसंघचालक मोहन भागवत यांचा सल्ला देवेंद्र फडणवीस यांना घ्यावा लागत आहे.
ते पुढे म्हणाले, मी कुणालाही भेटू शकतो. देवेंद्र फडणवीस यांनाही भेटायचे झाले तर मी त्यांना म्हणेन की, बस झाले तुमचे. महाराष्ट्राचे नुकसान, राज्याला मागे खेचले, शेतकऱ्यांना सहानभूती दाखवली नाही, अशा शब्दात जाब विचारेन. राजस्थान, मध्यप्रदेश, छत्तीसगड ही राज्ये आमच्याकडे आल्यावर आम्ही तेथील शेतकऱ्यांचा सातबारा कोरा केला. मातोश्रीवरून निमंत्रण आलं, तर नक्की जाईन, असे दलवाई यांनी म्हटले.
