मुंबई - मुंबईत सध्या लसीकरणाला मोठ्या प्रमाणात गर्दी होत आहे. त्यासाठी विभागवार लसीकरण केंद्रे उभारली जात आहेत. त्याचाच एक भाग म्हणून चारकोप सेक्टर 3मधील प्रसुतीगृह येथे लसीकरण केंद्र उभारण्यात आले. त्या केंद्राचे लोकार्पण मुंबईच्या महापौर किशोरी पेडणेकर यांच्याहस्ते बुधवारी (5 मे) करण्यात आले. तसेच महापौरांनी क्रॉफर्ड मार्केट येथील महात्मा फुले मंडईतील गाळेधारकांच्या समस्या, पुनर्विकास कामाची पाहणीही केली.
'नोंदणी करूनच लसीकरणाला या'
'सध्या लसींचा मर्यादित स्वरूपात पुरवठा होत आहे. त्यामुळे लसीकरण केंद्रांवर मोठ्या प्रमाणात गर्दी पाहायला मिळत आहे. लसीकरण केंद्रांकडून कन्फर्मचा संदेश प्राप्त झाल्यानंतरच नागरिकांनी घराबाहेर पडावे, असे आवाहन प्रशासनाकडून करण्यात आले आहे. सद्यस्थितीत नागरिकांच्या दुसऱ्या डोसला प्राधान्य देण्यात येत आहे', असे महापौर किशोरी पेडणेकर यांनी सांगितले. चारकोप सेक्टर 3मधील प्रसुतीगृह येथील लसीकरण केंद्राच्या लोकार्पण कार्यक्रमावेळी आमदार विलास पोतनीस, शिक्षण समिती अध्यक्षा संध्या दोशी तसेच संबंधित अधिकारी उपस्थित होते.
'डिजिटल माहिती फलक लावा'
'लसीकरण केंद्रांवर गर्दी होऊ नये यासाठी किती नागरिकांचे लसीकरण आज झाले, याची माहिती दर्शविणारा डिजिटल माहिती फलक लावा. या माहितीमुळे २०० नागरिकांचे लसीकरण होऊ शकेल. एवढी लस उपलब्ध असताना चारशे नागरिकांना उपस्थित राहावे लागणार नाही. तसेच ज्या नागरिकांचे लसीकरण आज होणे शक्य नाही, परंतु जे नागरिक लसीकरण केंद्रांवर आलेले आहेत त्यांना दुसऱ्या दिवशीचे टोकन देण्यात यावे. दुसऱ्या दिवशीसुद्धा या टोकन दिलेल्या नागरिकांना प्रथम प्राधान्य देण्यात यावे', असे निर्देशही महापौरांनी यावेळी दिले.
'सर्वाना लस मिळेल'
'लसीकरणापासून नागरिकांना वंचित ठेवले जाणार नाही. सर्वाना लस मिळेल याचे नियोजन केले जाणार आहे. ज्या प्रमाणात लसींचा पुरवठा होईल, त्या प्रमाणात लसीकरणाचा वेग वाढेल. नागरिकांनी या संपूर्ण लसीकरण मोहिमेला सहकार्य करावे', असे आवाहन पेडणेकर यांनी केले.
क्रॉफर्ड मार्केटची पाहणी
क्रॉफर्ड मार्केट येथील महात्मा फुले मंडईच्या गाळेधारकांच्या समस्या, तसेच पुनर्विकास कामाची पाहणीही मुंबईच्या महापौर किशोरी पेडणेकर यांनी केली. यावेळी गाळेधारकांशीही सविस्तर चर्चा केली. 'महापालिका महात्मा फुले मंडईचा पुनर्विकास करीत असून यामध्ये कुठल्याही गाळेधारकांचे नुकसान होणार नाही. त्यासोबतच प्रत्येक परवानाधारकांना त्यांची किती जागा आहे, पुनर्विकासाचे काम कधी पूर्ण होणार, तसेच किती जागा मिळेल, याची सविस्तर माहिती असलेले अधिकृत पत्र प्रत्येक परवानाधारकांना देण्यात येईल', असे पेडणेकरांनी म्हटले. याबाबतचे निर्देशही त्यांनी दिले. जेणेकरून गाळेधारकांचा कुठल्याही प्रकारचा गोंधळ न होता त्यांचे समाधान होईल. तसेच संबंधित कामे निर्धारित वेळेत पूर्ण करण्याचे निर्देश महापौरांनी दिले. महापौरांनी यावेळी गाळेधारकांना देण्यात येणाऱ्या संक्रमण शिबिराच्या जागेचीसुद्धा पाहणी केली. संबंधित ठिकाणी योग्य त्या सोयीसुविधा पुरविण्याचे निर्देशही महापौरांनी यावेळी दिले.
हेही वाचा - कोरोनाबाधित आरोपीच्या जामिनाचे पैसे पोलिसांनीच भरले
हेही वाचा - 'उद्धव ठाकरे यांचे खायचे अन् दाखवायचे दात वेगळे'
