मुंबई: मुंबईत ४६ लाख ३ हजार ३८८ घरांचा सर्व्हे करण्यात आला. त्यात ताप आणि लाल पुरळ असलेले ३६९५ संशयित रुग्ण सापडले (Record of suspected patients) आहेत. जानेवारीपासून आतापर्यंत गोवरचे २५२ रुग्ण दिसून आले आहेत. गोवर रुग्णांवर उपचार करण्यासाठी कस्तुरबा, गोवंडी शिवाजी नगर प्रसूती गृह, भारतरत्न डॉ. बाबासाहेब आंबेडकर रुग्णालय, राजावाडी, शताब्दी, सेव्हन हिल, कुर्ला भाभा , क्रांती ज्योती सावित्रीबाई फुले रुग्णालय बोरिवली आदी रुग्णालयात ३३० बेडस उपलब्ध करून देण्यात आले आहेत. त्यापैकी ९७ बेडवर रुग्ण असून २३३ बेड रिक्त आहेत. १४१ जनरल बेडपैकी ७१, १५४ ऑक्सीजन बेड पैकी २१, ३५ आयसीयु बेड पैकी ५ तर २० व्हेंटिलेट पैकी २ व्हेंटिलेटरवर (2 patients on ventilator) रुग्ण आहेत. आतापर्यंत अतिरिक्त सत्रात १९ हजार ९८० मुलांचे आणि गरोदर महिलांचे लसीकरण करण्यात आले आहे अशी माहिती पालिकेच्या आरोग्य विभागाने दिली.
मुंबईत १० तर बाहेरील ३ मृत्यू : मुंबईमधील रुग्णालयात आतापर्यंत एकूण १३ मृत्यू झाले आहेत. त्यापैकी १० मृत्यू मुंबईतील तर ३ मृत्यू मुंबईबाहेरील आहे. मुंबईमधील एकूण १० मृत्यूपैकी ८ जणांचा मृत्यू गोवारमुळे झाला आहे. २ जणांचा मृत्यू संशयित म्हणून नोंद झाला आहे. डेथ ऑडिट कमिटीची बैठक आयोजित केली जाणार आहे. या बैठकीत संशयित मृत्यूबाबत अहवाल येईल त्यामधून मृत्यूचे नेमके कारण समोर येणार आहे.
८ महिन्याच्या मुलाचा मृत्यू : गोवंडी येथील ८ महिन्याच्या मुलाचा २० नोव्हेंबर रोजी ताप आणि पुरळ आले होते. श्वसनाचा त्रास झाल्याने त्याला पालिकेच्या रुग्णालयात दाखल करण्यात आले. २१ नोव्हेंबर रोजी त्याची अवस्था सुधारत नसल्याने विशेष रुग्णालयात दाखल केले. २४ नोव्हेंबरला दुपारी १.१० वाजता गोवर सह अवयव काम करण्याचे बंद झाल्याने त्याचा मृत्यू झाला.
लसीकरण आणि जनजागृतीवर भर: मुंबई पालिकेच्या आरोग्य विभागाने केलेल्या सर्व्हेक्षणात ० ते २ वयोगटातील २० हजार मुलांचे लसीकरण राहिले आहे. काहींनी एकच डोस घेतला आहे. तर काहींनी लसिकरणच केलेले नाही. त्यामुळे अशा २० हजार मुलांवर पालिकेने लक्ष केंद्रित केले आहे. या सर्वांचे लसीकरण केले जात आहे. त्यासाठी अतिरिक्त कॅम्प आयोजित करण्यात आले आहेत. ० ते ५ वर्षामधील ज्या मुलांना लस दिली नसले त्यांनी लस घ्यावी असे आवाहन पालिकेने केले आहे. गोवंडी, चेंबूर, भायखळा, कुर्ला, मालाड, धारावी, सांताक्रूझ, वडाळा या ८ विभागात गोवरचे रुग्ण सर्वाधिक आहेत. यामुळे या विभागात जनजागृती केली जात आहे. धर्म गुरू, लोकप्रतिनिधी, सामाजिक कार्यकर्ते यांच्या मार्फत लसीकरणबाबत जनजागृती केली जात आहे. गरज पडल्यास बेड आयसीयु आणि व्हेंटिलेटरची संख्या वाढवली जाणार आहे.
