गोव्याच्या सांस्कृतिक मंत्र्यांनी साकारलेला 'संभाजी' तुम्ही पाहिलात का..?

गोव्याचे विद्यमान सांस्कृतिक मंत्री गोविंद गावडे हे वयाच्या सातव्या वर्षांपासून नाटकाची आवड जपणारे एक उत्तम अभिनेते आहेत. त्यांनी आजवर अनेक ऐतिहासिक आणि पौराणिक नाटकांमध्ये काम करून अनेक पुरस्कारदेखील मिळवले आहेत. त्यांचा 'इथे ओशाळला मृत्यू' या नाटकाचा खास सोहळा मुंबईतल्या या नाट्य मंदिरात रंगला होता.

गोवा - गोव्याच्या सांस्कृतिक मंत्र्याने काल चक्क मुंबईवर स्वारी केली. कुठे म्हणून काय विचारता अहो विधान भावनावर नव्हे तर मराठी व्यवसायिक नाटकाचे माहेरघर असलेल्या शिवाजी मंदिरवर. त्यासाठीचे निमित्तदेखील तसच खास होते, दस्तुरखुद्द सांस्कृतिक मंत्र्यांची मुख्य भूमिका असलेल्या 'इथे ओशाळला मृत्यू' या नाटकाचा खास सोहळा मुंबईतल्या या नाट्य मंदिरात रंगला होता.

इथे ओशाळला मृत्यू नाटकात संभाजी राजांचे पात्र साकारताना गोव्याचे सांस्कृतिक मंत्री गोविंद गावडे

खर पाहता सांस्कृतिक मंत्र्यांचा कला संस्कृती याच्याशी काहीतरी संबंध असावाच, अशी काही अट नाही. निदान तो कला, साहित्य, नृत्य, नाट्यकलेचा दर्दी असला तरीही पुरेस असतं. मात्र गोव्याचे विद्यमान सांस्कृतिक मंत्री गोविंद गावडे हे या सगळ्याला अपवाद आहेत. कारण वयाच्या सातव्या वर्षांपासून नाटकाची आवड जपणारे तावडे हे स्वतः एक उत्तम अभिनेते आहेत. आजवर अनेक ऐतिहासिक आणि पौराणिक नाटकांमध्ये काम करून त्यांनी अनेक पुरस्कारदेखील मिळवले आहेत. आपली राजकीय जबाबदारी पार पाडताना ते आपल्या या आवडीसाठी देखील आवर्जून वेळ काढतात.

गोविंद गावडे हे अपक्ष आमदार म्हणून गोव्यातून निवडून आले. त्यानंतर त्यांनी सरकार स्थापन करताना भाजपला पाठींबा दिला. त्यामुळे लगेचच त्यांची मंत्रिपदी वर्णी लागली. त्यांचे सांस्कृतिक क्षेत्रावरील प्रेम आणि आस्था पाहून तत्कालीन मुख्यमंत्री मनोहर पर्रीकर यांनी त्यांची सांस्कृतिक खात्याचा मंत्री म्हणून नियुक्ती केली. आजही ते ही आठवण आवर्जून सांगतात.
वसंत कानेटकर लिखित 'इथे ओशाळला मृत्यू' हे नाटक घेऊन ते मुंबई दौऱ्यावर आले होते. यापूर्वी त्यांच्या या नाटकाचे प्रयोग पुणे आणि कोल्हापूर येथेही झाले आहेत. नाटकात गावडे हे स्वतः संभाजी महाराजांची मुख्य भूमिका साकारतात. त्यांनी साकारलेले संभाजी महाराज पाहणे ही मोठी पर्वणीच आहे.

आमदार म्हणून काम करताना किंवा विधान भवनातून घरी येताना मिळणाऱ्या वेळात आपण संवाद पाठ करत असल्याचे त्यांनी सांगितले. सवड मिळेल तशा तालमी देखील करत असल्याचं त्यांनी आवर्जून नमूद केलं. नाटकात काम करणे ही आपली आवड असल्याने त्यासाठी लागेल ती सारी मेहनत आपण करत असल्याचे त्यांनी 'ईटीव्ही भारत'शी एक्सक्लुसिव्ह गप्पा मारताना सांगितले.

हेही वाचा - 'फसवणूक करून सत्तेत आलेल्या सरकारची कर्जमाफी देखील फसवीच'

विशेष म्हणजे त्यांचा हा छंद मतदारांना, विरोधकांना आणि मंत्रिमंडळातील त्यांच्या सहकाऱ्यांना देखील ठाऊक आहे. मात्र आजवर कधीही कुणी आपल्यावर विनाकारण टीका केलेली नसल्याचे त्यांनी सांगितले आहे. तसेच, सोशल मीडियावर देखील त्यांच्या नाटकात काम करण्यावर कुणीही आक्षेप घेतलेला नाही. करायचं ते काम चांगलंच करायचं आणि गोव्याचे नावलौकिक वाढवण्याचा प्रयत्न करायचा एवढाच गावडे यांचा ध्यास आहे. त्यात त्यांनी संभाजी महाराजाप्रमाणेच उत्तुंग स्वप्न पाहिले आहे असं म्हटलं तर वावग ठरणार नाही.

हेही वाचा - पालिका शाळांमधील मुलांना दिलेले टॅब उपयोगाविना पडून; विद्यार्थ्यांची होतेय गैरसोय