मुंबई - राज्यात खासगी प्रयोगशाळेत होणाऱ्या कोरोना चाचण्यांचे दर पुन्हा एकदा कमी करण्यात आले आहेत. प्रति तपासणीमागे 200 रुपयांनी हे दर कमी केले आहेत. त्यामुळे आता नव्याने निश्चित केलेल्या दरानुसार चाचण्यांसाठी 980, 1 हजार 400 आणि 1 हजार 800 रुपये असा कमाल दर आकारणे खासगी प्रयोगशाळांना बंधनकारक करण्यात आले आहे. यापेक्षा अधिक दर खासगी प्रयोगशाळांना आकारता येणार नाही. सुरुवातील कोरोना चाचणीचा दर 4 हजार 500 रुपये होता. तो आता 980 रुपयांपर्यंत कमी करून सर्वसामान्यांना दिलासा देण्याचा प्रयत्न करत असल्याचे आरोग्यमंत्री राजेश टोपे यांनी सांगितले.
कोरोना चाचणी दरांचे आहेत तीन टप्पे -
कोरोना चाचण्यांचे दर निश्चित करताना तीन टप्पे करण्यात आले आहेत. प्रयोगशाळेत तपासणी केल्यानंतर 980 रुपये दर आकारण्यात येईल. कोविड सेंटर, रुग्णालये, क्वारंटाईन सेंटरमधील प्रयोगशाळेतून सॅम्पल गोळा करुन तपासणी करण्यासाठी 1 हजार 400 रुपये दर आहे. तर, रुग्णाच्या घरी जाऊन सॅम्पल घेऊन तपासणी करण्यासाठी 1 हजार 800 रुपये असा कमाल दर आता निश्चित करण्यात आला आहे. सामान्य माणूस केंद्रस्थानी ठेवून राज्य शासनाने सातत्याने दरांमध्ये घट केल्याचे आरोग्यमंत्र्यांनी सांगितले.
चाचण्या करण्यावर जास्त भर -
राज्यात कोरोना नियंत्रणासाठी चाचण्यांवर भर दिला जात आहे. प्रती दहा लाख लोकसंख्येमागे 70 हजार चाचण्या केल्या जात आहेत. त्या आणखी वाढवण्यासाठी प्रयत्न केला जात आहे. जेणेकरुन कोरोनावर अधिक नियंत्रण मिळवता येईल, असे टोपे म्हणाले.
जास्त दर आकारल्यास होणार कारवाई -
राज्य शासनाने आजच कोरोना चाचणीच्या सुधारित दरांचा अध्यादेश जारी केला आहे. राज्यभरात सुधारित दरांनुसारच रुग्णांकडून पैसे आकारले जावेत. यासाठी जिल्हाधिकारी, महानगरपालिका आयुक्तांनी दक्षता घ्यावी. जर शासन नियमांपेक्षा जास्त पैसे आकारले तर कारवाई केली जाईल, असा इशाराही आरोग्यमंत्र्यांनी दिला आहे.
